Կարմրուկի վիրուսը երբեք դուրս չի գալիս օրգանիզմից․նպաստավոր պայմաններում կարող է ակտիվանալ․ Սահակյան․ ՏԵՍԱՆՅՈՒԹ

Առողջապահության նախարարության Հիվանդությունների վերահսկման և կանխարգելման ազգային կենտրոն (ՀՎԿԱԿ) տնօրենի տեղակալ Գայանե Սահակյանն ասուլիսի ընթացքում մատնանշեց երկու վտանգ, որը սպառնում է կարմրուկով հիվանդացության դեպքում:

Նշենք, որ մարտի 6-ի ժամը 11:00-ի դրությամբ՝ կարմրուկի դեպքերի թիվը Հայաստանում հասել է 20-ի, հոսպիտալացված է 19 քաղաքացի, 1-ը դուրս է գրվել։

«Համաճարակաբանական տեսակետից երկու կարևոր բան շեշտեմ․ կարմրուկի վիրուսը երբեք օրգանիզմից դուրս չի գալիս, նա մնում է ամբողջ կյանքի ընթացքում։ Սրա վտանգավորությունն այն է, որ եթե նպաստող որոշակի հանգամանքներ են առաջանում, վիրուսը կարող է ակտիվանալ, այս դեպքում առաջանում է ուղեղի թաղանթի բորբոքում, վտանգավորությունը դրա հետ է կապված, որը գրեթե 100 տոկոս մահվան ելք է առաջացնում։

Երկրորդ վատ հանգամանքը հետևյալն է․ եթե կարմրուկի վիրուսով մարդը վարակվում է, առաջանում է իմուն համակարգի հիշողության կորուստ։ Սա նշանակում է, որ եթե երեխան, ենթադրենք, բոլոր հիվանդությունների դեմ պատվաստվել է, կամ տարբեր հիվանություններով հիվանդացել, է և արդյունքում առաջացել է իմուն հիշողություն, կարմրուկի վիրուսով հիվանդանալուց հետո օրգանիզմն այլևս չի հիշում, և օրգանիզմը դառնում է խոցելի ցանկացած «անշառ» հիվանդությունների նկատմամբ։ Այդ պրոցեսը տևում է երեք տարի, որպեսզի իմուն համակարգը կրկին վերականգնվի»,- նշեց Գայանե Սահակյանը։

Մասնագետը հստակեցրեց, որ չի ասում, թե նորից պետք է պատվաստվել, երեք տարի հետո իմուն համակարգը գտնում է իր հիշողությունը, սակայն այդ երեք տարվա ընթացքում պետք է չափազանց զգույշ լինել։

Մանրամասները՝ տեսանյութում։