Կարմրուկի դեմ պատվաստումների շարժական կետեր կստեղծվեն․ Ավանեսյան․ ՏԵՍԱՆՅՈՒԹ

Մեկնարկել է առողջապահության նախարար Անահիտ Ավանեսյանի մամուլի ասուլիսը՝ կարմրուկով պայմանավորված իրավիճակի վերաբերյալ: Մարտի 6-ի ժամը 11:00-ի դրությամբ՝ կարմրուկի դեպքերի թիվը Հայաստանում հասել է 20-ի, հոսպիտալացված է 19 քաղաքացի, 1-ը դուրս է գրվել։ Այս մասին ասուլիսի ժամանակ հայտնեց ՀՀ առողջապահության նախարար Անահիտ Ավանեսյանը։

Նախարարն ընգծեց, որ կարմրուկի կանխարգելման ամենագործուն միջոցը պատվաստումն է:

«Ազգային օրացույցով սահմանված է իրականացնել պատվաստում 2 դեղաչափով, առաջինը՝ 1 տարեկան երեխաներին, երկրորդ դեղաչափն իրականացվում է 4-6 տարեկանում: Երկու դեղաչափով պատվաստված լինելու պարագայում վարակման հավանականությունը գրեթե բացառվում է: Առանձնահատուկ հորդորում ենք այն ընտանիքներին, որտեղ կան պատվաստման տարիքին հասած երեխաներ, անպայման պատվաստվեն, որովհետև դրանով նրանք պաշտպանում են նաև իրենց փոքր քույրիկ-եղբայրներին:

Բացի այդ, քաղաքացիները, ովքեր չեն պատվաստվել կամ չեն հիշում պատվաստվել են թե ոչ, կարող են դիմել ու պատվաստվել՝ կանխարգելելու հիվանդությամբ վարակվելը»,- ասաց Ավանեսյանը:

Ավանեսյանը վստահեցրեց, որ բոլոր պոլիկլինիկաներն ապահովված են կարմրուկի պատվաստանյութով ։ Նախարարը նաև հայտնեց, որ կարմրուկի դեմ պատվաստումների շարժական կետեր կստեղծվեն․ «Առաջիկա օրերին նոր խմբաքանակ կմտնի երկիր, և մեկ–երկու շարժական պատվաստման կետեր կբացվեն, որպեսզի պատվաստումային գործընթացն ավելի հասանելի լինի քաղաքացիներին»։

Մանրամասները՝ տեսանյութում։