Հայաստանում կարմրուկի գրեթե բոլոր դեպքերը «բերովի են»` այլ երկրներից․ Ավանեսյան․ ՏԵՍԱՆՅՈՒԹ

Մեկնարկել է առողջապահության նախարար Անահիտ Ավանեսյանի մամուլի ասուլիսը՝ կարմրուկով պայմանավորված իրավիճակի վերաբերյալ: Մարտի 6-ի ժամը 11:00-ի դրությամբ՝ կարմրուկի դեպքերի թիվը Հայաստանում հասել է 20-ի, հոսպիտալացված է 19 քաղաքացի, 1-ը դուրս է գրվել։ Այս մասին ասուլիսի ժամանակ հայտնեց ՀՀ առողջապահության նախարար Անահիտ Ավանեսյանը։

Նախարարի խոսքով՝ հոսպիտալացվածների առողջական վիճակը գնահատվում է միջին ծանրության, գտնվում են բժիշկների խիստ հսկողության ներքո։

«Վարակվածներից15 երեխա են, 5-ը՝ մեծահասակ։ Առաջին դեպքը ներթափանցել է արտերկրից, հիվանդը երեխա է եղել, որից հետո վարակվել են այլ անձինք», – ասաց նախարարը։

Նշենք, որ կարմրուկով հիվանդներից 19-ը պատվաստված չէ, 1-ը թերի է պատվաստված (1 դեղաչափ):

Ավանեսյանի խոսքով` իր գլխավորությամբ ստեղծել է աշխատանքային խումբ, որն իրականացնում է վարակիչ հիվանդությունների հակազդման պլանով նախատեսված միջոցառումներ։ Այդ ֆոնին որոշակի փոփոխություններ են իրականացվում նաև ազգային օրացույցով սահմանված պատվաստումներն ակտիվացնելու համար։

«Շատ կարևոր է կարմրուկի վաղ հայտնաբերումը, կոնտակների շրջանակի հստակ պարզաբանումը և 72 ժամվա ընթացքում կոնտակտավորների կանխարգելիչ պատվաստումը, նրանց մեկուսացումը»,–նշեց նախարարը։

Հիշեցնենք, որ կարմրուկը սուր վարակիչ հիվանդություն է, որը տարածվում է օդակաթիլային ճանապարհով, պատվաստումների ազգային օրացույցով կարմրուկի դեմ պատվաստումները նախատեսված են 1 և 4-6 տարեկան երեխաների համար:

Մանրամասները՝ տեսանյութում։