23.11.2024 | 15:30
ՄԻՊ-ը փաստաբանական գործունեության հարկման հետ կապված դիմել է ՍԴ
Մարմնամարզիկ Արթուր Դավթյանը աշխարհի գավաթի խաղարկությունում ոսկե մեդալ նվաճեց
04.03.2023 | 17:51
Օլիմպիական խաղերի բրոնզեմեդալակիր, աշխարհի ու Եվրոպայի չեմպիոն Արթուր Դավթյանը ոսկե մեդալ է նվաճել Դոհայում անցկացված սպորտային մարմնամարզության առանձին գործիքների աշխարհի գավաթի խաղարկության երկրորդ փուլում։
Հենացատկի վարժության եզրափակչում Դավթյանը հիանալի է հանդես եկել և վաստակել 15,083 միավոր ՝ զբաղեցնելով առաջին հորիզոնականը։ Դավթյանը ոսկե մեդալ էր նվաճել նաև գերմանական Կոտբուս քաղաքում կայացած աշխարհի գավաթի խաղարկության առաջին փուլում:
Հայաստանի մյուս ներկայացուցիչները ևս ավարտել են իրենց ելույթները Դոհայում։ Արթուր Ավետիսյանն ու Վահագն Դավթյանը երեկ հանդես են եկել օղակների վարժության եզրափակչում, սակայն անմասն են մնացել մեդալներից։ Ավետիսյանը զբաղեցրել է 4-րդ, իսկ Դավթյանը՝ 7-րդ տեղը։
Հայաստանի մյուս ներկայացուցիչ, երիտասարդ մարմնամարզիկ Գագիկ Խաչիկյանը նժույգթափեր վարժության որակավորման փուլում 14,133 միավոր է վաստակել և զբաղեցրել 10-րդ տեղը: Նույն վարժության որակավորման փուլում Հարություն Մերդինյանը 13,500 միավորով գրավել է 21-րդ տեղը: Երկու մարմնամարզիկն էլ դուրս չեն եկել եզրափակիչ:
Աշխարհի գավաթի խաղարկությունը վարկանիշային է աշնանը Բելգիայում անցկացվելիք աշխարհի առաջնության համար, որի ընթացքում կխաղարկվեն Փարիզի Օլիմպիական խաղերի ուղեգրեր։
