14.09.2026 | 23:23
Պապիկյանի գլխավորած պատվիրակությունն աշխատանքային այցով մեկնել է Չինաստան
Դատախազությունը պահանջում է Սուրիկ Խաչատրյանից բռնագանձել 19.1 մլրդ դրամի գույքեր և ակտիվներ. 50 էջանոց առարկություն կներկայացվի
Հասարակություն
03.03.2023 | 20:17
ՀՀ Հակակոռուպցիոն դատարանում այսօր շարունակվեց Գլխավոր դատախազությունն ընդդեմ Սուրիկ Խաչատրյանի և նրա հետ փոխկապակցված անձանց գործի քննությունը՝ ապօրինի գույքի բռնագանձման մասով։ Գլխավոր դատախազությունը հայց է ներկայացրել ընդդեմ Սյունիքի նախկին մարզպետ Սուրիկ Խաչատրյանի, նրա որդիներ Տիգրան Խաչատրյանի և Տրդատ Խաչատրյանի, ինչպես նաև Լորետա Բարսեղյանի, Վարդան Բարսեղյանի, Մանվել Մալինցյանի, Էրիկ Համբարձումյանի, Լուսինե Բարսեղյանի և Նորայր Մնացականյանի՝ ապօրինի ծագում ունեցող գույքի բռնագանձման պահանջով։
Այս հայցով դատարանին պահանջ է ներկայացվել հօգուտ ՀՀ-ի բռնագանձել 5 անշարժ գույք՝ Երևան քաղաքում գտնվող առանձնատուն (երկու հասցեով), բնակարան, հասարակական նշանակության օբյեկտ, Գորիս քաղաքում գտնվող շինություն, 3 տրանսպորտային միջոցներ (անհնարինության դեպքում՝ դրանց միջին շուկայական արժեքները, որն ընդհանուր կազմում է ավելի քան 1.530.135.900 ՀՀ դրամ), մասնակցություններ թվով 3 իրավաբանական անձերում, 614.544.139 ՀՀ դրամ՝ որպես ապօրինի դրամական միջոցների մնացորդ, 2.410.463.523 ՀՀ դրամ, որը չի հիմնավորվում անձի օրինական եկամուտներով, ֆիզիկական և իրավաբանական անձանց տրամադրված ընդհանուր 4.450.350.364 ՀՀ դրամ փոխառությունների և այլ դեբիտորական պարտքերի պահանջի իրավունքը, ինչպես նաև օֆշորային կազմակերպությանը փոխանցված 10.098.300.000 ՀՀ դրամ ներդրման գումարը:
Հայցադիմումը շուրջ 19.1 մլրդ դրամ արժեքով ապօրինի ծագման գույքերն ու ակտիվները բռնագանձելու պահանջով է։
Նախորդ նիստում հայցադիմումն արդեն իսկ հրապարակվել էր, ինչի մասով այսօր Սուրիկ Խաչատրյանի ներկայացուցիչ, փաստաբան Վահագն Գրիգորյանը հայտարարեց, որ 50 էջանոց առարկություններ ունի։ Մինչ դրանց հրապարակումը՝ դատարանը լսեց Դատախազության միջնորդությունը հայցի առարկայի և հիմքի փոփոխության մասին։ Դրանք, դատախազ Գևորգ Քոչարյանի խոսքով, տեխնիկական վրիպակներ են և հայցի առարկան չեն փոխում։
«Հիմքի՝ վրիպակների դեմ չեմ առարկում, բայց հայցի առարկայի փոփոխությունները դատարանում քննության առարկա չպետք է դառնան, որովհետև հայցվորը կարող է գույքի բռնագանձման պահանջ ներկայացնել, բայց ոչ որոշել, թե որ գույքն է բռնագանձվելու»,- նշեց Վահագն Գրիգորյանը։
Դատական նիստը հետաձգվեց։ Հաջորդիվ կներկայացվեն հայցի մասով առարկությունները։
Ռոզա Վարդանյան
