07.09.2026 | 23:24
Հայկական պտուղ-բանջարեղենի արտահանումը ԱՄԷ․ Պապոյանը քննարկել է ծավալների ավելացումը
ՀՅԴ-ն մնաց անդրդվելի, բայց պարտադիր կուտակային համակարգի մասին նախագիծն առաջին ընթերցմամբ ընդունվեց
Քաղաքականություն
20.06.2018 | 12:01
Ազգային ժողովն այսօր առաջին ընթերցմամբ ընդունեց «Կուտակային կենսաթոշակների մասին» օրենքում փոփոխություններ կատարելու մասին օրենքի նախագիծը՝ 79 կողմ, 2 դեմ և 7 ձեռնպահ քվեարկությամբ։
«Ծառուկյան» խմբակցության պատգամավոր Նաիրա Զոհրաբյանը նշեց, որ թեև իրենք մշտապես դեմ են արտահայտվել պարտադիր կուտակային բաղադրիչին, սակայն ներկայացված նախագիծը որոշակիորեն մեղմել է վիճելի հարցերը և կքվեարկեն կողմ՝ հետագայում պարտադիր բաղադրիչից ազատվելու համար։
«Ելք» խմբակցության պատգամավոր Էդմոն Մարուքյանն էլ նկատեց, որ պարտադիր կուտակայինի էջը փակված չէ, կողմ են քվեարկելու նախագծին, հետգայում պարտադիր բաղադրիչի հետ կապված քննարկումներ իրականացնելու համար։
ԱԺ երկու խմբակցությունների դիրքորոշումներից ամբողջապես հակադիր տեսակետ հայտնեց ՀՅԴ խմբակցության ղեկավար Արմեն Ռուստամյանը։ Վերջինս նշեց, որ այս նախագիծը դիտարկում են իրենց սկզբունքայնության տեսակետից: «Պարտադիր բաղադրիչը առաջացնում է լուրջ խնդիրներ, խաթարում է սերունդների համերաշխությունը և ստիպում է, որ մարդն այսօրվա խնդիրները չլուծելով գումար ետ գցի վաղվա համար»,- ասաց պատգամավորը և հավելեց, որ իրենք կքվեարկեն ձեռնպահ։
