Վստահ եմ՝ թմրամիջոցների ապօրինի շրջանառության մեծ ծավալներ կան․ նախատեսվում է ուժեղացնել հսկողությունը․ Վահե Ղազարյան․ ՏԵՍԱՆՅՈՒԹ

Հայաստանի Հանրապետությունում 2023 թվականի հունվարի 1-ից մինչ օրս արձանագրվել է թմրամիջոցների ապօրինի շրջանառության 324 դեպք: Ազգային ժողովում կառավարության հետ հարցուպատասխանի ժամանակ այս տվյալները ներկայացրեց ՀՀ ներքին գործերի նախարար Վահե Ղազարյանը` անդրադառնալով հարցին, թե ինչ իրավիճակ է հանրապետությունում, ինչ քայլեր է ձեռնարկում նախարարությունը թմրաշրջանառության դեմ պայքարի շրջանակում։
«ՆԳՆ ոստիկանությունը բավականաչափ աշխատանքներ է կատարվում թմրամիջոցների ապօրինի շրջանառության դեմ պայքարի ուղղությամբ։ 2023 թվականի հունվարի 1-ից մինչև օրս արձանագրվել է 324 դեպք, որից 122-ը` իրացման, ևս 150-ը` պահելու։
Այս թմրամիջոցներից մոտ 45-ը սինթետիկ նյութեր են եղել։

Պատկերը մտահոգիչ է, վստահ եմ՝ թմրամիջոցների ապօրինի շրջանառության ծավալները մեծ են»,- նշեց Ղազարյանը։

Նախարարը նաև նշեց, որ 2023 թվականը հայտարարվել է թմրամիջոցների դեմ պայքարի տարի։

«Պայքարն ավելի արդյունավետ դարձնելու համար ՆԳՆ–ն համագործակցում ենք միջազգային կառույցների հետ, ուսումնասիրում ենք այլ երկրների արդյունավետ փորձերը, ինչի արդյունքում նպատակ ունենք օրենսդրական փոփոխություններ իրականացնել»,- նշեց Ղազարյանը՝ հավելելով, որ իրավապահ կառույցը նաև բացատրական աշխատանքներ է կատարում անչափահասների և երիտասարդների շրջանում։

Նախարարը նաև հայտնեց, որ նախատեսվում է սահմանային անցակետերում ուժեղացնել հսկողությունը, որտեղ կներգրավվեն հատուկ վարժեցված շներ։

Ղազարյանն անդրադարձավ նաև համացանցի միջոցով թմրամիջոցների վաճառքին և հիշեցրեց, որ 2022 թվականին Քրեական ոստիկանության գլխավոր վարչությունում ստեղծվել է համացանցի միջոցով թմրամիջոցների ապօրինի շրջանառության դեմ պայքարի բաժին։ Դրա շնորհիվ 2023 թվականին արդեն իսկ հայտնաբերվել է տելեգրամյան 143 ալիք, որոնք թմրամիջոցներ են իրացրել։ ՆԳՆ-ն նախատեսում է նորաստեղծ բաժինն ընդլայնել և ստեղծել վարչություն։

Մանրամասները՝ տեսանյութում։