Չենք ցանկանա մասնակցել բարեփոխման, որի արդյունքում ոստիկանը ցուցարար կծեծի, մարդ կխոշտանգի. Իոաննիսյան․ ՏԵՍԱՆՅՈՒԹ

Ավելի քան 2,5 տարի ներգրավված էինք ոստիկանության բարեփոխումների համակարգող խորհրդում և մի շարք աշխատանքային խմբերում, որոնք կից էին այդ խորհրդին, որոշակի առումով աշխատանքն արդյունավետ էր, մեր առաջարկների մի մասն ընդունվել է, կարողացել ենք ազդեցություն ունենալ պրոցեսի վրա, բայց վերջին ժամանակաշրջանում նկատեցիքն, որ բարեփոխումների նկատմամբ ոստիկանության դիմադրությունն ավելի ու ավելի է մեծանում, և դա իր հետևանքներն է ունենում։ «Ոստիկանության բարեփոխումներ. համակարգը դիմադրում է. ինչո՞ւ» թեմայով քննարկման ժամանակ այս մասին նշեց  «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը։

«Օրինակ՝ մենք նոյեմբերին բարձրաձայնեցինք այն հարցը, որ տույժերով ու ծառայողական քննություններով պարեկներին «տեռորի» է ենթարկում համակարգը, դրանից հետո էլ ավելի շատ բևեռացան տույժերը պարեկային ծառայողների վրա՝ 58 տոկոսից հասնելով 80 տոկոսի։

Այդ պայմաններում մենք հասկացանք, որ մեր մասնակցությունը ոստիկանությունում բարեփոխումների այդ գործընթացին լինելու է դեկորատիվ բնույթի, լեգիտիմացնելու է գործընթացը և անարժեք փոփոխություններ են իրականացվելու»,- նշեց Իոաննիսյանը։

Նրա դիտարկմամբ՝ ոստիկանական համակարգում առկա միտումները շատ խնդրահարույց են։

«Չենք ցանկանա մասնակցել այնպիսի բարեփոխման, որի արդյունքում «բարեփոխված» ոստիկանը կարող է խաղաղ ցուցարարի ծեծել, օպերները կարող են մարդ խոշտանգել, փաստաբանի ծեծել։ Մենք կցանկանանք մասնակցել իրական բարեփոխումների»,- ասաց Իոաննիսյանը։

Մանրամասները՝ տեսանյութում։