Դասագրքերը գնալով կորցնում են իրենց նշանակությունը․ ապաքաղաքական զրույց Ժաննա Անդրեասյանի հետ․ ՏԵՍԱՆՅՈՒԹ

Factor TV-ի A-politic հաղորդաշարի հյուրն է ՀՀ կրթության, գիտության, մշակույթի և սպորտի նախարար Ժաննա Անդրեասյանը: Նրա կարծիքով՝ միանգամայն բնական է, որ կրթության խնդիրները մշտապես գտնվում են հասարակության և լրատվամիջոցների ուշադրության կենտրոնում, քանի որ այդ ոլորտի շահառուները, ըստ էության, բոլոր քաղաքացիներն են, և նրանց դժգոհությունները կարելի է բնականոն համարել: Ավելի ցավալի կլիներ, եթե հասարակությունն անտարբեր մնար կրթության խնդիրների հանդեպ:

Հաղորդման հյուրի համոզմամբ՝ դասագրքերը ժամանակակից ուսումնական պրոցեսում աստիճանաբար կորցնում են իրենց նշանակությունը, հատկապես՝ բուհական պրակտիկայում, որտեղ ավելի կարևոր է ծանոթանալ սկզբնաղբյուրին, քան այն մեկնաբանություններին, որոնք տրվում են դասագրքերում: Բացի այդ, դասագրքերում հրապարակված տեղեկությունները կարող են արագ հնանալ և իրական կյանքում կիրառելի չլինել: Նույնը, որոշ վերապահումներով, կարելի է ասել դպրոցական դասագրքերի մասին, որոնք շատ դեպքերում կարելի է փոխարինել առարկայական փաթեթներով:

Նախարարը համաձայն է, որ դպրոցի ամենակարևոր առաքելություններից է մարդկային շփման հմտություններ զարգացնելը, ինչը հնարավոր չէ փոխարինել հեռավար ուսուցմամբ: Ժաննա Անդրեասյանը նկատել է, որ դեռահասներն իրար հետ շփվում են էլեկտրոնային հաղորդագրություններով՝ նույնիսկ ֆիզիկապես նույն տարածքում գտնվելով: Նրանցից շատերը չեն ուզում գնալ դպրոց, որովհետև չգիտեն, թե ինչպես են օգտագործելու իրենց գիտելիքներն ու ունակությունները իրական կյանքում: Դա, ըստ հաղորդման հյուրի, մեր հասարակության ամենակարևոր խնդիրներից մեկն է:

Մանրամասները տեսանյութում:

Արամ Աբրահամյան