25.11.2024 | 09:50
Արտարժույթների փոխարժեքները՝ նոյեմբերի 25-ի դրությամբ
ԱՄՆ-ն աջակցում է Ղրիմում ՌԴ ռազմական օբյեկտներին ուկրաինացիների հարվածներին․ Նուլանդ
Քաղաքականություն
17.02.2023 | 14:46
Անկախ նրանից, թե երբ և ինչպես կավարտվի ռուս-ուկրաինական պատերազմը, պետք է երաշխիքներ տրվեն, որպեսզի Ռուսաստանը նորից չսանձազերծի այն։ BBC-ի ռուսական ծառայության փոխանցմամբ՝ այս մասին ասել է ԱՄՆ պետքարտուղարի քաղաքական հարցերով տեղակալ Վիկտորյա Նուլանդը։
«Մենք ոչ մի կերպ չպետք է հավատանք, քանի դեռ Վլադիմիր Պուտինը կամ նրա նման մեկն իշխանության է, որ պատերազմն իսկապես ավարտված է: Եթե նույնիսկ արդար խաղաղություն ձեռք բերվի, միևնույն է, երկարաժամկետ պլանի և ապագայի ուկրաինական բանակ կառուցելու կարիք կլինի, ինչը կարող է Պուտինին հետ պահել հետագայում նման ինչ-որ բան ծրագրելուց»,- հայտարարել է Վիկտորյա Նուլանդը։
Վաշինգտոնի Քարնեգի հիմնադրամում առցանց քննարկման ժամանակ Նուլանդն ասել է, որ ԱՄՆ-ը ոչ միայն դիտարկում է, թե ինչ զենք կարող է ուղարկվել ուկրաինական մարտադաշտ հենց հիմա, այլ նաև այն, թե ինչպիսի զենքեր կպահանջվեն Ռուսաստանին ապագայում անվտանգ զսպելու համար:
Պատասխանելով հարցին՝ արդյո՞ք Վաշինգտոնը վախենում է հատել Կրեմլի կողմից գծված ցանկացած «կարմիր գիծ»՝ աջակցելով Ուկրաինային, մասնավորապես, եթե Կիևը որոշի ռազմական ճանապարհով վերադարձնել Ռուսաստանի կողմից 2014 թվականին բռնակցված Ղրիմը, ամերիկյան դիվանագիտության ղեկավարի տեղակալն ասել է, որ ԱՄՆ-ը երբեք չի ճանաչի Ղրիմը ռուսական, քանի որ Ուկրաինային է պատկանում դրա ամբողջ տարածքը՝ միջազգայնորեն ճանաչված սահմաններով։
«Ենթադրություններ չեմ անի, թե որտեղ կորոշեն ուկրաինացիները պատերազմել կամ ինչպես կորոշեն կարճաժամկետ, միջնաժամկետ և երկարաժամկետ հեռանկարում գործել Ղրիմի վերաբերյալ: Մենք Ղրիմը համարում ենք Ուկրաինա»,-հայտարարել է Նուլանդը։
Նրա խոսքով՝ Ղրիմի օկուպացիայից հետո Ռուսաստանը թերակղզին դարձրել է իր ռազմական հենակետը՝ այնտեղ տեղադրելով մարտական օբյեկտներ, զենքի պահեստներ և հրամանատարական կենտրոններ, որոնք սպառնում են և կսպառնան Ուկրաինայի անվտանգությանը, քանի դեռ այնտեղ են։
«Դրանք օրինական թիրախներ են։ Ուկրաինան հարվածում է դրանց։ Եվ մենք աջակցում ենք դրան։ Ուկրաինան երբեք անվտանգ չի լինի, քանի դեռ Ղրիմն առնվազն ապառազմականացված չէ»,- հայտարարել է Վիկտորյա Նուլանդը։
Տաթև Ֆռանգյան
