Քաղաքականություն
16.02.2023 | 11:28
Ադրբեջանի արտգործնախարար Ջեյհուն Բայրամովը հեռախոսազրույց է ունեցել ԱՄՆ պետքարտուղարի Եվրոպայի ու Եվրասիայի հարցերով տեղակալ Քերըն Դոնֆրիդի հետ։ Ադրբեջանի ԱԳՆ հաղորդմամբ՝ կողմերը քննարկել են իրավիճակը Հարավային Կովկասում և Բաքվի և Երևանի միջև բանակցային գործընթացի հեռանկարները։
«Կողմերը քննարկել են տարածաշրջանում առկա իրավիճակը և Ադրբեջանի և Հայաստանի միջև խաղաղության պայմանագրի շուրջ բանակցությունների հեռանկարները», – ասվում է հաղորդագրության մեջ։
Բայրամովը, Լաչինի միջանցքի փակման ադրբեջանական կեղծ թեզերն է ներկայացրել, իբր, «եռակողմ հայտարարության համաձայն՝ Ադրբեջանը երաշխավորում է քաղաքացիների, տրանսպորտային միջոցների և ապրանքների տեղաշարժի անվտանգությունը Լաչինի ճանապարհով, իսկ Հայաստանը չարաշահում է Լաչինի ճանապարհը անօրինական տնտեսական գործունեության, հայ զինվորականների և ականների փոխադրման համար»։ Նա կրկին նշել է, թե «Լաչինի միջանցքը փակած ցուցարարների գործողությունները օրինական են և պահանջները դեռ չեն բավարարվել, իսկ ահա Արցախում էլ հումանիտար իրավիճակը վատ չէ»։ Բայրամովը նաև հայտարարել է, թե իբր «Հայաստանը խաղաղ համաձայնագրի բանակցային գործընթացում դիմում է մանիպուլյացիաների»։
Նշվում է, որ կողմերը մտքեր են փոխանակել նաև երկկողմ հետաքրքրություն ներկայացնող այլ և տարածաշրջանային հարցերի շուրջ։ Հավելենք, որ Դոնֆրիդը ավելի վաղ հեռախոսազրույց էր ունեցել ՀՀ ԱԳ նախարար Արարատ Միրզոյանի հետ։
Էմմա Չոբանյան
