29.10.2026 | 16:09
Ըմբիշ Վազգեն Թևանյանն առաջին անգամ դուրս եկավ աշխարհի առաջնության եզրափակիչ. ՏԵՍԱՆՅՈՒԹ
ԱՄՆ-ում խոցված աերոստատն օդ է բարձրացել Չինաստանի Հայնան նահանգից
Քաղաքականություն
15.02.2023 | 16:49
ԱՄՆ զինվորականները հետևել են կործանված չինական աերոստատի երթուղուն դրա մեկնարկից ի վեր։ Այս մասին հայտնել է The Washington Post-ը (WP)՝ վկայակոչելով մի քանի ամերիկացի պաշտոնյաների, որոնք տեղեկությունը տրամադրել են անանունության պայմանով:
Պարբերականի զրուցակիցների խոսքով՝ աերոստատը մեկ շաբաթ եղել է հսկողության տակ՝ մինչ հունվարի վերջին ներխուժել է ԱՄՆ օդային տարածք։ Այն օդ է բարձրացել Չինաստանի հարավում գտնվող Հայնան կղզու բազայից, փոխանցում է DW-ի ռուսական ծառայությունը:
Ըստ ամենայնի՝ սկզբում օբյեկտը շարժվել է դեպի ԱՄՆ-ի կողմից վերահսկվող Գուամ կղզի, որտեղ տեղակայված են մի քանի ամերիկյան ռազմաբազաներ, բայց հետո հանկարծակի շարժվել է դեպի հյուսիս, ասել են աղբյուրները: Ավելի ուշ այն թռել է Ալեուտյան կղզիների վրայով և Կանադայի երկինքով, որտեղից, ըստ երևույթին, ուժեղ քամիների պատճառով ներխուժել է ԱՄՆ օդային տարածք:
WP-ի փոխանցմամբ՝ վերլուծաբանները չեն բացառում, որ Չինաստանն իր «հետախուզական ապարատով» միտումնավոր չի ներխուժել ԱՄՆ մայրցամաքային տարածք։
Հիշեցնենք, որ փետրվարի 4-ին ԱՄՆ ռազմական ինքնաթիռը խոցել է չինական աերոստատը Հարավային Կարոլինայի ափերի մոտ։ Չինաստանը հերքել է լրտեսության մասին ԱՄՆ-ի մեղադրանքները՝ ասելով, որ «հետազոտական աերոստատը շեղվել է կուրսից ֆորսմաժորային իրավիճակի պատճառով»։ Այս միջադեպը սրել է ԱՄՆ-ի և Չինաստանի՝ առանց այն էլ լարված հարաբերությունները։
Տաթև Ֆռանգյան
