07.06.2026 | 00:08
Ձերբակալվել է Բյուրական համայնքի նախկին ղեկավար Զարզանդ Գրիգորյանը
Իրանն ու Չինաստանը համագործակցության 20 փաստաթուղթ են ստորագրել
Քաղաքականություն
14.02.2023 | 21:03
Իրանն ու Չինաստանը երեքշաբթի Պեկինում կայացած բարձր մակարդակի հանդիպման ժամանակ ստորագրել են համագործակցության 20 փաստաթուղթ և փոխըմբռնման հուշագիր, գրում է Tasnim news agency-ն։
Տեղեկացվում է, որ Իրանի և Չինաստանի բարձրաստիճան պաշտոնյաները փաստաթղթերը ստորագրել են Իրանի նախագահ Էբրահիմ Ռաիսիի և նրա չինացի գործընկեր Սի Ցզինպինի ներկայությամբ կայացած հանդիպման ժամանակ:
Համաձայնագրերը ենթադրում են համագործակցություն տարբեր ոլորտներում, ներառյալ՝ ճգնաժամային կառավարումը, զբոսաշրջությունը, տեղեկատվական և հաղորդակցական տեխնոլոգիաները, շրջակա միջավայրը, միջազգային առևտուրը, մտավոր սեփականությունը, գյուղատնտեսությունը, արտահանումը, առողջապահությունը և բժշկական ոլորտը, լրատվամիջոցների գործունեությունը, սպորտը և մշակութային ժառանգությունը:
Նշվում է, որ Ռաիսին Պեկին է այցելել Սի Ցզինպինի պաշտոնական հրավերով։
Չինաստանը վերջին տարիներին ամրապնդել է իր դիրքերը որպես Իրանի գլխավոր առևտրային գործընկեր։ Իրանական ընթացիկ տարվա առաջին տասը ամիսների ընթացքում (2022 թվականի մարտի 21 – 2023 թվականի հունվարի 20) Չինաստանն Իրան է արտահանել 12,7 միլիարդ դոլարի ապրանք, իսկ Իրանից ներմուծումը կազմել է 12,6 միլիարդ դոլար:
Տաթև Ֆռանգյան
