14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Իրանը նոր հեռահար մարտական անօդաչուներ է մատակարարել Ռուսաստանին․ The Guardian
Քաղաքականություն
13.02.2023 | 14:53
Բրիտանական The Guardian պարբերականը, հղում անելով Իրանում իր աղբյուրներին, հայտնում է, որ Թեհրանն անցյալ տարի Ռուսաստան է ուղարկել հեռահար մարտական անօդաչու թռչող սարքերի խմբաքանակ՝ իրանական պետական ավիաընկերության նավերի և ինքնաթիռների օգնությամբ։
Աղբյուրի տվյալներով՝ խոսքը «Շահեդ կամիկաձե» անօդաչուների մասին չէ, որոնք Ռուսաստանն օգտագործում է Ուկրաինայի կրիտիկական ենթակառուցվածքների վրա հարձակվելու համար։ Guardian-ի աղբյուրները նշում են, որ Մոսկվան, ի թիվս այլ բաների, ստացել է ավելի բարդ անօդաչու սարքավորումներ, որոնք թույլ են տալիս հրթիռային հարվածներ հասցնել ավելի մեծ հեռավորությունից:
Հրապարակման մեջ ասվում է, որ 2022 թվականի նոյեմբերին 10 ռուս սպաներից և ինժեներներից բաղկացած պատվիրակությունն այցելել է Թեհրան, որտեղ նրանց ցուցադրվել են Իրանի ռազմական տեխնոլոգիաների բոլոր հնարավորությունները։
Ռուսներն ընտրել են վեց «Մուջահեր-6» անօդաչու թռչող սարքեր, որոնք ունեն մոտ 200 կիլոմետր հեռահարություն և կարող են երկու հրթիռ կրել յուրաքանչյուր թևի տակ, նրանք նաև հետաքրքրություն են ցուցաբերել «Շահեդ-191» և «Շահեդ-129» անօդաչու թռչող սարքերի հանդեպ, որոնք ունակ են խոցել ցամաքային թիրախները: Ի տարբերություն կամիկաձե անօդաչու սարքերի՝ նման սարքերը պետք է հարվածներ հասցնեն և վերադառնան բազա։
Միաժամանակ, Իրանը 54 հոգանոց ինժեներներից բաղկացած խումբ է ուղարկել Մոսկվա՝ օգնելու ռուս զինվորականներին սովորել կիրառել ԱԹՍ-ները։
«Ռուսաստանը, հնարավոր է, ցանկանում է ավելի բարդ անօդաչու թռչող սարքեր, որոնք կարող են համեմատվել թուրքական Bayraktar-TB2-ների հետ, քանի որ Ուկրաինան ավելի ու ավելի հաջող է պայքարում փոքր կամիկաձե անօդաչուների դեմ, որոնք պետք է թռչեն ցածր բարձրության վրա` մինչև հարված հասցնելը»,- նշում են հոդվածի հեղինակները:
Տաթև Ֆռանգյան
