05.11.2024 | 16:14
Ալիևը Ղրղզստանում է՝ մասնակցելու Թյուրքական պետությունների կազմակերպության գագաթնաժողովին
Հրթիռներն անցել են ՆԱՏՕ-ի տարածքով, սա մարտահրավեր է հավաքական անվտանգությանը․ Զելենսկի
Քաղաքականություն
10.02.2023 | 19:13
Ուկրաինայի նախագահ Վլադիմիր Զելենսկին երկրի վրա հերթական հրթիռային հարձակումն ահաբեկչություն է անվանել, որը պետք է կանգնեցվի։ Նրա խոսքով՝ ուրբաթ առավոտից Ռուսաստանն արձակել է առնվազն 70 հրթիռ, խոցվել է առնվազն 60 հրթիռ։
«Նրանց բոլոր թիրախները եղել են քաղաքացիական անձինք, քաղաքացիական ենթակառուցվածքները: Ցավոք, եղել են նաև թիրախների խոցումներ, կան զոհեր: Ցավակցում եմ ընտանիքներին»,- ասել է Զելենսկին տեսաուղերձում։
Ըստ նրա՝ ռուսական մի քանի հրթիռներ անցել են Մոլդովայի և Ռումինիայի օդային տարածքով։
«Այդ հրթիռները մարտահրավեր են ՆԱՏՕ-ին, հավաքական անվտանգությանը: Սա ահաբեկչություն է, որը կարելի է և պետք է կանգնեցնել: Ես շնորհակալություն եմ հայտնում բոլոր նրանց, ովքեր հասկանում են դա»,- ասել է Ուկրաինայի ղեկավարը՝ շնորհակալություն հայտնելով նաև երկրի ռազմաօդային ուժերին, ինչպես նաև «բոլորին և յուրաքանչյուրին, ովքեր պաշտպանում են Ուկրաինային և ուկրաինացիներին»:
Այսօր ավելի վաղ Ուկրաինայի ԶՈՒ գլխավոր հրամանատար, գեներալ Վալերի Զալուժնին հայտնել էր, որ ռուս զինվորականների կողմից Սև ծովից Ուկրաինայի ուղղությամբ արձակված երկու «Կալիբր» հրթիռներ անցել են Մոլդովայի և Ռումինիայի օդային տարածքով։
Մոլդովայի Պաշտպանության նախարարությունը հաստատել է իր տարածքով հրթիռների թռիչքի մասին տեղեկությունը, մինչդեռ Բուխարեստում հայտնել են, որ չեն կարող հաստատել Ռումինիայի վրայով ռուսական հրթիռների թռիչքը։
Տաթև Ֆռանգյան
