08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Մոլդովայի կառավարությունը հրաժարական է տվել. պատճառները չեն նշվում
Քաղաքականություն
10.02.2023 | 18:41
Մոլդովայի վարչապետ Նատալյա Գավրիլիցան ուրբաթ հրաժարական է տվել։ Երկրի օրենսդրության համաձայն՝ վարչապետից հետո ամբողջ կառավարությունը հեռանում է։ Նախագահ Մայա Սանդուն կաբինետի ղեկավարի թեկնածու կառաջարկի խորհրդարանական խմբակցությունների հետ խորհրդակցություններից հետո, գրում է BBC-ի ռուսական ծառայությունը։
«Շատ շնորհակալ եմ, Նատալյա: Չնայած աննախադեպ դժվարություններին՝ երկիրը ղեկավարվում էր պատասխանատվությամբ, մեծ խնամքով և նվիրվածությամբ: Մենք ունենք կայունություն, խաղաղություն և զարգացում, որտեղ մյուսները ցանկանում էին պատերազմ և սնանկություն»,- ասել է Սանդուն:
Նատալյա Գավրիլիցան վարչապետի պաշտոնը զբաղեցնում էր 2021 թվականի օգոստոսից, իսկ մինչ այդ գլխավորել է Մոլդովայի Ֆինանսների նախարարությունը։
Նա հրաժարականի կոնկրետ պատճառներ չի հայտնել, սակայն ուրբաթ կայացած ճեպազրույցի ժամանակ նշել է, որ իր կառավարությունը վերջին մեկուկես տարվա ընթացքում երկիրը ղեկավարել է շարունակական ճգնաժամերի պայմաններում։
Պաշտոնյան նաև հասկացնել է տվել, որ իր կաբինետը չի գտել ժողովրդի աջակցությունը:
«Եթե Մոլդովայում կառավարությունը նույնքան աջակցություն ունենար, որքան ԵՄ-ում, Բրյուսելում, մենք շատ ավելիին կհասնեինք»,- ասել է Գավրիլիցան։
Նախօրեին նա վերադարձել է Բրյուսելից, որտեղ գործընկերների հետ քննարկել է Մոլդովայի ներկայիս տնտեսական իրավիճակը և երկրի՝ ԵՄ-ին միանալու հեռանկարները։
Մոլդովայում տնտեսական իրավիճակը շարունակաբար վատանում է։ Էներգիայի գներն աճում են մոլդովացիների միջին խավի եկամուտներին անհամաչափ։ Սնունդն ու դեղերը թանկանում են։
Անցյալ տարվա սեպտեմբերից մինչև ցուրտ եղանակի սկիզբը Քիշնևի կենտրոնում ամեն կիրակի հակակառավարական ցույցեր էին տեղի ունենում։ Դրանց կազմակերպիչը՝ փախուստի մեջ գտնվող մոլդովացի քաղաքական գործիչ և մեդիա մագնատ Իլան Շորը, կառավարության հրաժարականը համարում է իր գործունեության արդյունք։
Տաթև Ֆռանգյան
