Քաղաքականություն
10.02.2023 | 15:54
Բաքվում ՌԴ դեսպան Միխայիլ Բոչարնիկովը ադրբեջանական Haqqin.az-ի հետ զրույցում անդրադարձել է Հայաստանում ԵՄ քաղաքացիական առաքելության տեղակայմանը։
«ՌԴ-ի և Ադրբեջանի գնահատականները հիմնականում համընկնում են։ Ցանկանում եմ պարզաբանել ՌԴ ԱԳՆ հայտարարությունների հետ կապված, որ այն ոչ թե Ռուսաստանի շահերին սպառնացող, այլ հայ և ադրբեջանցի ժողովուրդների շահերին վնաս պատճառելու մասին էր, քանի որ այդ առաքելությունը ծավալվում է Հայաստանի տարածքում։ Կրկին վերադառնալով խնդիրների լուծման տարածաշրջանային ձևաչափի պահպանման կարևորությանը՝ մենք ելնում ենք այն հանգամանքից, որ Հարավային Կովկաս արտատարածաշրջանային գործոն ներմուծելու հիմքեր չկան։ Իսկ ԵՄ-ն գործերը տանում է հենց դրան, շատ անշնորհքաբար՝ առանց Ադրբեջանի հետ համաձայնեցնելու։ Այս հարցում, իհարկե, ԵՄ-ն ԱՄՆ-ի և ՆԱՏՕ-ի անմիջական կցորդն է։ Նրանք դիտարկում են ԱՊՀ տարածքը որպես Ռուսաստանին հակադրվելու գոտի և փորձում աշխարհաքաղաքական բաղադրիչ ներմուծել տարածաշրջանային իրավիճակ։ Նման գործողություններն ուղղված են Ռուսաստանին հայ-ադրբեջանական կարգավորման գործընթացից դուրս մղելուն։ Չպետք է խաբվել «քաղաքացիական առաքելություն» եզրույթով»,- հայտարարել է Բոչարնիկովը։
Նա նշել է, որ հիմքեր կան ենթադրելու, թե այն ամբողջովին քաղաքացիական չի լինելու, և ֆրանսիացի ժանդարմներ են ընդգրկվելու առաքելության կազմում։
«Առաքելությունն ինքնին հանդիսանում է Եվրամիության ընդհանուր անվտանգության և պաշտպանության քաղաքականության մեքենա: Այստեղ է այն հավանականությունը, որ այն կվերաճի ինչ-որ ներկայության՝ հնարավոր ռազմական բաղադրիչներով, հնարավորություն, որ այս առաքելությունը սկսի դիտարկել Ղարաբաղի տարածքը, ինչը կլինի նրա մանդատի խախտում։ Սա ստիպում է մեզ ասել, որ կան ռիսկեր։ Իսկ եթե Ղարաբաղի տարածքում առաքելության ներկայությունն ընդլայնելու փորձեր տեղի ունենան, դա կարող է խնդիրներ առաջացնել տարածաշրջանում ներկա ռուս խաղաղապահների և սահմանապահների համար։ Նման խնդիրներն անվտանգության ռիսկ են ամբողջ Հարավային Կովկասի համար։ Դա է խնդիրը: Ուստի ես նորից ու նորից վերադառնում եմ այն մտքին, որ մենք՝ այս շրջանի բնակիչներս, արտաքին ուժերի կարիք չունենք մեր խնդիրները լուծելու համար»,- ասել է ՌԴ դեսպանը։
Էմմա Չոբանյան
