Թուրքական լրատվամիջոցների արձագանքը Հայաստանից փրկարարների օգնությանը

Թուրքիայում ավերիչ երկրաշարժից տուժած Ադըյամանում նախօրեին աշխատանքն է սկսել Հայաստանից ուղևորված որոնողափրկարարական խումբը։ Թուրքական լրատվամիջոցները հիմնականում կարճ լուրերի տեսքով են անդրադառնում հայ փրկարարներին աշխատանքին՝ նշելով, որ Հայաստանից ևս խումբ է ժամանել։

Թուրքական պետական TRT Haber-ը «Հայաստանը որոնողափրկարարական խումբ է ուղարկել Թուրքիա» վերնագրով  հրապարակման մեջ, օրինակ, գրում է, որ «Հայաստանը խումբ է ուղարկել Թուրքիա՝ աջակցելու որոնողափրկարարական աշխատանքներին Քահրամանմարաշում 7,7 և 7,6 բալ ուժգնությամբ երկրաշարժերից հետո, որոնց հետևանքով 10 նահանգ է տուժել»։

«Ինչպես տեղեկացնում է Հայաստանի պաշտոնական լրատվական գործակալությունը՝ երեկ վարչապետ Նիկոլ Փաշինյանի և նախագահ Ռեջեփ Թայիփ Էրդողանի հեռախոսազրույցից հետո Երևանը խումբ է ուղարկել Թուրքիա՝ որոնողափրկարարական աշխատանքներին մասնակցելու համար։ Նշվում էր, որ երեկ երեկոյան մեկնած թիմը բաղկացած է 57 հոգուց»,- ասվում է հրապարակման մեջ։

Նույնաբովանդակ տեղեկություն է հրապարակել նաև պետական Անադոլու գործակալությունը, որը վերահրապարակել են շատ այլ լրատվականներ։

«Հայաստանը փրկարար խմբեր է ուղարկում Թուրքիա և Սիրիա» վերնագրով ևս հրապարակումներ կան։

Իսկ ահա հեռուտաընկերությունները գրեթե չեն անդրադառնում Հայաստանի օգնությանը։ Մասնավորապես, հայկական «Մարմարա» օրաթերթը թվիթերյան իր էջում հայտնում է, որ նախօրեին «FOX TV-ն թվարկել է երկրները, որոնք օգնություն և խմբեր են ուղարկել, այդ թվում՝ Հունաստանը։ Հայաստանի մասին չի նշվել»։

«Երևի չեն իմացել, որ հայկական խումբն աշխատում է։ Խումբն աշխատում է Ադըյամանում»,- ասվում է պարբերականի թվիթերյան գրառման մեջ։

Էմմա Չոբանյան