Սերժ Սարգսյանի իմացությա՞մբ է ՊՆ-ի գույքը վաճառվել. Սեյրան Օհանյանը զրկվեց անձեռնմխելիությունից․ ՏԵՍԱՆՅՈւԹ

ԱԺ ընդդիմադիր «Հայաստան» խմբակցության ղեկավար Սեյրան Օհանյանն այսօր զրկվեց պատգամավորական անձեռնմխելիությունից։ ՔՊ-ական պատգամավորները միաձայն կողմ քվեարկեցին, իսկ «Հայաստան» և «Պատիվ ունեմ» խմբակցությունները չէին մասնակցում քվեարկությանը։

ՀՀ գլխավոր դատախազ Աննա Վարդապետյանն արդեն երկրորդ օրն է՝ խորհրդարանում միջնորդագրեր է ներկայացնում պաշտպանության նախկին նախարար Սեյրան Օհանյանի նկատմամբ քրեական հետապնդում սկսելու վերաբերյալ։ Խոսքը երեք միջնորդագրերի մասին է։ Այսօր դրանցից մեկը, որը վերաբերում էր, այսպես կոչված, «անպիտան հրթիռների» գործին, քննարկվեց փակ ռեժիմով։ Իսկ բաց ռեժիմով ներկայացված երրորդ միջնորդությունը, ըստ Աննա Վարդապետյանի, առնչվում է Պաշտպանության նախարարության գույքերի՝ հատուկ մշակված հանցավոր սխեմաների միջոցով վաճառքի գործարքներին։

Խոսքը Երևանի Շենգավիթ վարչական շրջանի Բագրատունյաց 81, 81/1 և Էրեբունի վարչական շրջանի Արին Բերդի փողոցում գտնվող անշարժ գույքերի մասին է։ Factor TV-ն այսօր այցելեց գլխավոր դատախազի նշած հասցեներով՝ պարզելու համար, թե այս պահին այդ տարածքում ինչ անշարժ գույքեր են գտնվում։

Բագրատունյաց 81 հասցեի շինությունում գործում են ավտոլվացման և ավտովերանորգման կետեր, վաճառվում են ավտոպահեստամասեր։ Տարածքում ներկաները հրաժարվեցին մեկնաբանել դատախազի հայտարարությունները։ Անմիջապես հարևանությամբ գտնվում է Բագրատունյաց 81/1 հասցեն, որտեղ նկատելի են ապամոնտաժված կառույցների մնացորդներ։

Այս գործարքը տեղի է ունեցել 2015 թվականի ամռանը՝ Օհանյանի պաշտոնավարման նախավերջին տարում։ Աննա Վարդապետյանն այսօր հայտարարեց, որ Սեյրան Օհանյանն անձամբ է տվել իր համաձայնությունը Շենգավիթ վարչական շրջանում գտնվող այս շենքը վերջնականապես վաճառելու համար։ Գնորդը սփյուռքահայ գործարար Վահե Յագուբյանն է։

Ըստ գործի նյութերի՝ ՊՆ-ի գույքերի վաճառքի արդյունքում Վահե Յագուբյանը և խմբի մյուս անդամները պետության՝ 5 մլրդ 884 մլն 300 հազար դրամ արժողությամբ անշարժ գույքերի դիմաց վճարել են ընդամենը 703 մլն դրամ։

Վահե Յագուբյանը «Գլենդել հիլզ» ընկերության սեփականատերն է։ Ընկերությունը Ռոբերտ Քոչարյանի և Սերժ Սարգսյանի իշխանության տարիներին պետական բազմամիլիարդանոց ծրագրերի շրջանակում բնակարանաշինության աշխատանքներ է իրականացրել։ Ի դեպ, շահագործումից կարճ ժամանակ անց գյումրեցիներն ահազանգում էին, որ աղետի գոտում «Գլենդել հիլզ»-ի կառուցած բնակարանների առաստաղների ծեփը պոկվում է, իսկ հատակները երերում են ոտքերի տակ։

Վահե Յագուբյանն այժմ հետախուզման մեջ է, հայտնաբերվելուց անմիջապես հետո կալանավորվելու է։

Այս գործի հետ առնչություն ունի նաև ՀՀ նախկին նախագահ Սերժ Սարգսյանը։ Ակնհայտ է, որ ՊՆ-ի՝ միլիարդների արժեք ունեցող գույքերի վաճառքը չէր կարող տեղի ունենալ առանց երկրի ղեկավարության իմացության։ Աննա Վարդապետյանն այսօր տեղեկացրեց, որ Սեյրան Օհանյանը նրան տեղյակ էր պահում գործարքի մասին։

Ինքը՝ Սերժ Սարգսյանը, այս գործով ցուցմունք է տվել։ Նշենք, որ Սեյրան Օհանյանին այսօրվանից միանգամից երեք մեղադրանք է ներկայացվում․ ՊՆ-ի օտարման ոչ ենթակա գույքերի վաճառք, ՊՆ-ի շենք-շինությունների վաճառք՝ պետության համար ոչ շահութաբեր եղանակով, և «անպիտան հրթիռների» գործը, որով անցնում է նաև նախկին նախարարներից Դավիթ Տոնոյանը։

Նշենք, որ Սեյրան Օհանյանը ո՛չ երեկ, ո՛չ այսօր չէր մասնակցում իրեն մեղադրանք առաջադրելու հարցով նիստերին։ Նա թեման չի մեկնաբանում նաև լրագրողների հետ զրույցում։ Միայն մի քանի օր առաջ հայտարարել էր, թե իշխանությունները շոու են բեմադրում՝ հանրային հնչեղություն ունեցող խնդիրներից ուշադրությունը շեղելու համար։

Մանրամասները՝ տեսանյութում։

Նարեկ Կիրակոսյան