12.01.2025 | 14:16
Առաջիկա օրերին օդի ջերմաստիճանն էապես չի փոխվի
Ջո Բայդենը ՌԴ-ի ներխուժումն Ուկրաինա անվանել է «սպանիչ հարձակում», որը հիշեցնում է Երկրորդ համաշխարհային պատերազմը
Քաղաքականություն
08.02.2023 | 16:38
ԱՄՆ նախագահ Ջո Բայդենն Ուկրաինա ռուսական ներխուժումն անվանել է «սպանիչ հարձակում», որը հիշեցնում է Երկրորդ համաշխարհային պատերազմը։ Բայդենը հավաստիացրել է ուկրաինացիներին, որ Ամերիկան կաջակցի իրենց «այնքան ժամանակ, որքան պահանջվի»՝ Ռուսաստանի շարունակվող ագրեսիայի դեմ, և զգուշացրել մյուս բռնապետական պետություններին, որ Ամերիկայի դեմ խաղադրույքը վատ խաղադրույք է, փոխանցում է VOA-ն:
«Դեսպա՛ն, Ամերիկան միասնական է ձեր երկրին աջակցելու հարցում: Մենք ձեզ հետ կլինենք այնքան ժամանակ, որքան պահանջվի»,- Ուկրաինայի դեսպան Օքսանա Մարկարովայի ներկայությամբ հայտարարել է ԱՄՆ նախագահը։
Կոնգրեսին ուղղված ելույթում նա նաև հիշեցրել է, որ մեկ տարի առաջ Ռուսաստանի նախագահ Վլադիմիր Պուտինը դաժան պատերազմ է սանձազերծել Ուկրաինայի դեմ։ Բայդենը դա անվանել է «սպանիչ հարձակում, որը հիշողության մեջ առաջացնում է մահվան և ավերածությունների պատկերներ, որոնք Եվրոպան կրել է Երկրորդ համաշխարհային պատերազմի ժամանակ»:
«Պուտինի ներխուժումը բոլոր ժամանակների փորձություն է դարձել։ Փորձություն ԱՄՆ-ի համար։ Փորձություն աշխարհի համար։ Կպաշտպանե՞նք մենք, արդյոք, բոլոր հիմնարար սկզբունքները։ Կպաշտպանե՞նք, արդյոք, մարդկանց իրավունքը՝ ազատ ապրել բռնապետությունից։ Կպաշտպանե՞նք, արդյոք, ժողովրդավարությունը»,- հարցադրումներ է արել Բայդենը։
Սպիտակ տան ղեկավարը նշել է, որ նման պաշտպանությունը կարևոր է, քանի որ այն պահպանում է խաղաղությունը և հետ է պահում պոտենցիալ ագրեսորներին ԱՄՆ-ի անվտանգությանն ու բարգավաճմանը սպառնացող վտանգից:
«Մեկ տարի անց մենք գիտենք պատասխանը։ Այո՛, կանենք: Եվ այո՛, մենք արեցինք: Միասին մենք արեցինք այն, ինչ Ամերիկան միշտ անում է բոլորից լավ: Մենք տարանք մեր հետևից, միավորեցինք ՆԱՏՕ-ն և կառուցեցինք համաշխարհային կոալիցիա։ Մենք դեմ հանդես եկանք Պուտինի ագրեսիային։ Մենք աջակցեցինք ուկրաինացի ժողովրդին», ասել է Ջո Բայդենը։
Տաթև Ֆռանգյան
