«Վալլեքս» ընկերությունը շանտաժ է անում, Կառավարությունը պետք է թույլ չտա. բնապահպան

Ինչպես արդեն տեղեկացրել ենք, երեկվանից Ալավերդի քաղաքը ծածկված է ծխի ամպով և բնակիչները, իրենց խոսքով՝ ստիպված են շնչել աղտոտված ու վտանգավոր օդը:

Factor.ma-ի հետ զրույցում «Հայկական բնապահպանական ճակատ» նախաձեռնության անդամ Լևոն Գալստյանը նշեց, որ այս դեպքը հերթականն է և նորից, փաստորեն,  Ալավեդի քաղաքի բնակիչներին թունավորւմ են՝ օդ արտանետելով ծանր մետաղներով հագեցած ծուխ. ««Վալլեքս» խմբին պատկանող այս գործարանից առաջին անգամ չէ, որ  արտանետվում է թունավորված օդ: Այդ մասին բազմիցս տեղյակ ենք պահել ««Վալլեքս» ընկերության ղեկավարությանը: Նրանք չեն ցանկանում գործարանում տեղադրել հատուկ ֆիլտրեր և մեզ սպառնում են՝ «եթե խոչընդտեք, գործարանը կփակենք և կհեռանանք», և ըստ էության, մարդիկ կմնան առանց աշխատանքի: Բայց չէ՞ որ խոսքն այստեղ օդ արտանետվող ծծմբի երկօքսիդի, կապարի, մկնդեղի և այլ ծանր մետաղների մասին է, որի հետևանքով ունենում ենք քաղցկեղով հիվանդացությունների աճ և, որ ամենավատն է, արատներով ծնված բազմաթիվ երեխաներ»:

Դիտարկմանն՝ այս պարագայում ի՞նչ արձագանքի պետք է արժանանա ընկերության նման գործելաոճը Կառավարության կողմից, արդյոք պե՞տք է կիրառվեն որոշակի սանկցիաներ կամ ուժի մեջ մտնեն նոր կարգավորումներ, Լևոն Գալստյանը նկատեց. «Պետք է թույլ չտալ «Վալլեքս» ընկերությանը շանտաժ անել: Նախորդ Կառավարություններն այդ շանտաժին ենթարկվում էին,  հուս ունենք, որ մեր նոր Կառավարությունը դա թույլ չի տա, որովհետև ցանկացած Կառավարություն, որը մտածում է ժողովրդի և բնության անվտանգության մասին, այս հարցում պարտավոր է գործուն մեխանիզմներ կիրառել»: