Մոսկվան ԱՄՆ դեսպանատնից պահանջել է «չմիջամտել Ռուսաստանի գործերին»

Մոսկվայում ԱՄՆ դեսպանատանը բողոքի նոտա է հանձնվել՝ պահանջով՝ դադարեցնել միջամտությունը Ռուսաստանի ներքին գործերին։ Այս մասին ՌԻԱ Նովոստիին հայտնել է ՌԴ ԱԳՆ ղեկավարությանը մոտ աղբյուրը։

«Այս տարվա փետրվարի 7-ին Մոսկվայում ԱՄՆ դեսպանատանը պաշտոնական նոտա է փոխանցվել՝ պահանջելով դադարեցնել դիվանագիտական ​​առաքելության կարգավիճակին անհամատեղելի գործողությունները, որոնք միջամտություն են Ռուսաստանի Դաշնության ներքին գործերին։ ՌԴ ԱԳՆ-ն փաստում է, որ չնայած բազմիցս արված նախազգուշացումներին, որոնք, մասնավորապես, պարունակվում են ԱԳՆ 2022 թվականի դեկտեմբերի 9-ի նոտայում, ամերիկյան դիվանագիտական ​​առաքելությունը շարունակում է չարամիտ գործունեությունը տեղեկատվական տարածքում՝իրեն թույլ տալով ոչ պատշաճ հայտարարություններ ընդունող երկրի ղեկավարության վերաբերյալ, ինչպես նաև կեղծիքներ տարածելով ՌԴ զինված ուժերի մասին, ինչը քրեորեն պատժելի արարք է»,- ասել է աղբյուրը։

Նրա խոսքով՝ «ամերիկացի դիվանագետներին նախազգուշացվել է դիվերսիոն աշխատանք իրականացնելու, «ազդեցության գործակալներ» հավաքագրելու փորձերի մասին՝ նպատակ ունենալով տարաձայնություններ սերմանել ռուս հասարակության մեջ, հրահրել հակապետական ​​գործողություններ»։

Գործակալության զրուցակիցը նշել է, թե այդ ամենի հետ «կապված աշխատակիցները հեռացվելու են զբաղեցրած պաշտոններից»։

«Այդ կապակցությամբ Մոսկվայում ԱՄՆ նոր դեսպան Լին Թրեյսիին, որը հունվարի 30-ին ընդունվել է ԱԳՆ-ում՝ իր հավատարմագրերի պատճենը հանձնելու համար, կոշտ ներկայացվել է՝ խստորեն պահպանել ռուսական օրենքները և դադարեցնել գործունեությունը, որը հակասում է Ռուսաստանի իշխանությունների պահանջներին և դիվանագիտական ​​հարաբերությունների մասին Վիեննայի կոնվենցիայի դրույթներին»,- հավելել է աղբյուրը։

Էմմա Չոբանյան