Մակրոնն ի՞նչ է խոստացել Փաշինյանին․ ասվեց՝ ՀՀ-ի թշնամիները Ֆրանսիայինն են․ մեր շահերը համընկնում են․ Արման Մելիքյան. ՏԵՍԱՆՅՈՒԹ

Նիկոլ Փաշինյանն ու Էմանուել Մակրոնը հեռախոսազրույցի ընթացքում քննարկել են Ադրբեջանի կողմից Լաչինի միջանցքի շուրջ երկամսյա փակումը։ Մակրոնը նշել է միջանցքի անխափան գործունեության կարևորությունը, և որ Ֆրանսիան պատրաստ է շարունակել նպաստել այդ խնդրի լուծմանը։ Նաև Արարատ Միրզոյանի հետ դեռ հունվարի սկզբին հեռախոսով զրուցած Մեծ Բրիտանիայի Եվրոպայի հարցերով պետնախարար Լեո Դոքերթին է խոսել Ադրբեջանի ԱԳ նախարարի հետ, քննարկվել է Լաչինում իրավիճակը։ Հիշում ենք՝ Դոքերթին Լորդերի պալատում միջանցքի փակման մասին քննարկման ժամանակ ասել էր՝ անհապաղ պիտի բացվի միջանցքը։ Ի դեպ, Մեծ Բրիտանիան 350,000 ֆունտ է հատկացրել միջանցքի փակումից տուժածներին օգնելու համար։

Ի՞նչ տեղարժերի մասին են վկայում այս փաստերը։ Factor TV-ին տված հարցազրույցում ՀՀ արտակարգ և լիազոր դեսպան, Արցախի նախկին արտգործնախարար Արման Մելիքյանը կարծիք է հայտնում, որ այս պրոցեսները վկայում են Լաչինի միջանցքի փակման խնդրի շուրջ ծավալվող երկխոսության առկայությունը ՌԴ-ի և Արևմուտքի մասնակցությամբ։

«ՌԴ-ն իր խաղաղապահների միջոցով պարտավորություններ ունի Արցախի հանդեպ և միջանցքի անխափան աշխատանքի ապահովման հետ կապված։ Հումանիտար իրավիճակը մնում է ծանր, Արցախի 150,000 բնակիչ կտտանքի և ոչ մարդկային վերաբերմունքի է ենթարկվում, երբ միջազգային հանրության ակտիվ գործողությունները չկան շրջափակումը նախաձեռնողների՝ Ադրբեջանի և ՌԴ-ի դեմ»,- ասաց նա։

Արման Մելիքյանը նշում է, որ եթե ՌԴ-ն ունենար քաղաքական որոշում, ապա միջանցքը կբացվեր մեկ ժամվա ընթացքում։ Սակայն դա տեղի չի ունեցել, քանի որ, ըստ նրա, նոյեմբերի 23-ին Երևանում ՀԱՊԿ-ի գագաթնաժողովում փաստաթղթերը չստորագրելուց հետո ՌԴ-ն այսպիսով պատժում է ՀՀ-ին։ Արտակարգ և լիազոր դեսպանը կարևոր է համարում նաև հասկանալ, թե ի՞նչ է խոստացել Էմանուել Մակրոնը Նիկոլ Փաշինյանին, հատկապես, երբ Ֆրանսիայի ՆԳ նախարարը վերջերս հայտարարեց, որ ՀՀ-ի թշնամիները նաև Ֆրանսիայի թշնամիներն են։

Հարցազրույցն ամբողջությամբ՝ տեսանյութում։

Ռոբերտ Անանյան