16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
Թուրքիայում և Սիրիայում երկրաշարժն ավելի քան 4300 մարդու կյանք է խլել․ թիվը շարունակում է աճել
Քաղաքականություն
07.02.2023 | 11:00
Թուրքիայի հարավում և Սիրիայի հյուսիսում փրկարարական աշխատանքները շարունակվել են ողջ գիշեր, գրում է BBC-ի ռուսական ծառայությունը: Ըստ աղբյուրի՝ երկու հզոր երկրաշարժերի հետևանքով զոհերի թիվն այս պահին 4310 է։
7,8 մագնիտուդով առաջին երկրաշարժը տեղի էր ունեցել երեկ տեղական ժամանակով 04:17-ին, օջախը գտնվել էր Թուրքիայի հարավարևելքում՝ Գազիանթեփ քաղաքի մոտ՝ 17,9 կմ խորության վրա։ Դրան հաջորդել էին ավելի քան 40 հետցնցումներ։
Այնուհետև տեղական ժամանակով մոտ 13:30-ին տեղի է ունեցել 7,5 մագնիտուդով երկրորդ երկրաշարժը, որի ուժգնությունը հասել է 10-11 բալի։ Երկրաշարժի էպիկենտրոնը գտնվել է Թուրքիայի հարավարևելյան Ղահրամանմարաշ շրջանի Էլբիստան շրջանում։
Երկու երկրներում հազարավոր շենքերի փլուզումից հետո փլատակների տակ մնացած մարդկանց որոնելու նպատակով ողջ գիշեր փրկարարական աշխատանքները շարունակվել են:
Տարբեր երկրները, այդ թվում՝ ԱՄՆ-ը և Հարավային Կորեան, օգնություն են ուղարկում տարածաշրջան այն բանից հետո, երբ Թուրքիան դիմեց օգնության կոչով։ Կարմիր մահիկի նախագահ Քերեմ Կինիկը կոչ է արել մարդկանց իրենց սեփական մեքենաներով չգնալ երկրաշարժի գոտիներ՝ մարդասիրական օգնություն տրամադրելու համար։ Փոխարենն առաջարկել է վերմակներ, տաք հագուստ և կոշիկներ բերել հավաքման կետեր, որտեղից դրանք այնուհետև կառաքվեն տուժած շրջաններ։
«Մեքենաներ են եղել, որոնք ճանապարհին ընկել են 50 մետր խորությամբ ճեղքվածքը, ճանապարհներին ձյուն է, մերկասառույց»,- զգուշացրել է նա։
Սառնամանիքը, ձյունն ու անձրևը դժվարացնում են փլուզված շենքերի փլատակների տակ ողջ մնացածներին գտնելը: Ականատեսների վկայությամբ՝ նրանք լսում են փլատակների տակ թաղված մարդկանց ձայները։ «Գոռում են, ասում են՝ փրկիր մեզ, բայց մենք չենք կարողանում նրանց փրկել… Առավոտից այստեղ ոչ ոք չի հայտնվել»,- Հաթայ նահանգում մի տղամարդ պատմել է Reuters-ին:
Տաթև Ֆռանգյան
