Ստամբուլում հյուպատոսության փակումից հետո Թուրքիայի ԱԳՆ է կանչվել Գերմանիայի դեսպանը

Հինգշաբթի օրը Թուրքիայի արտգործնախարարություն կանչված տարբեր երկրների դիվանագետների թվում է նաև Թուրքիայում Գերմանիայի դեսպանը, լրագրողներին հայտնել է Գերմանիայի ԱԳՆ պաշտոնական ներկայացուցիչ Անդրեա Զասեն։
«Ես կարող եմ հաստատել, որ մեր դեսպանը տարբեր երկրների այլ գործընկերների հետ կանչվել է Թուրքիայի ԱԳՆ՝ զրույցի համար», – ուրբաթ օրը կայացած ճեպազրույցում ասել է Զասեն, հայտնում են թուրքական ԶԼՄ-ները։ Պատճառը, նրա խոսքով, Ստամբուլում Գերմանիայի գլխավոր հյուպատոսության փակվելն է՝ ահաբեկչության վտանգի պատճառով։ Նա պարզաբանել է, որ Թուրքիայի այլ քաղաքներում տեղակայված գերմանական դիվանագիտական ներկայացուցչությունների մնացած մասը չեն տուժել այդ միջոցներից։ «Դրանք բաց են մնում», – ավելացրել է Զասեն:
Ավելի վաղ Թուրքիայի արտգործնախարար Մևլութ Չավուշօղլուն, մեկնաբանելով Ստամբուլում մի շարք արևմտյան երկրների հյուպատոսարանների փակման հետ կապված իրավիճակը, հայտարարել էր, որ դժվար է այդ երկրներին դաշնակիցներ և բարեկամներ անվանել։
Հիշեցնենք, որ ավելի վաղ Ստամբուլում Շվեդիայի, Նիդեռլանդների, Մեծ Բրիտանիայի, Ֆրանսիայի, Շվեյցարիայի և Գերմանիայի գլխավոր հյուպատոսությունները հայտարարել են, որ դադարեցրել են այցելուներ ընդունել քաղաքի կենտրոնում ահաբեկչական հարձակումների սպառնալիքի պատճառով։

Տաթև Ֆռանգյան