22.03.2026 | 21:42
Վահագն Խաչատուրյանն առանձնազրույց է ունեցել Վրաստանի նախագահի հետ
Լավրովն Ադրբեջանի թեզը կրկնեց՝ ՀՀ-ին «օկուպանտ» կոչելով․ ՌԴ-ն ընդունեց ռազմական ուժով հարց լուծելը․Տաթևիկ Հայրապետյան․ ՏԵՍԱՆՅՈՒԹ
Քաղաքականություն
03.02.2023 | 20:15
ՌԴ ԱԳ նախարար Սերգեյ Լավրովը ՀՀ-ի կողմից Ադրբեջանի տարածքների օկուպացիայով է հիմնավորում, թե ինչու ՀԱՊԿ երկրները չդատապարտեցին Ադրբեջանի ագրեսիան, մի բան, որ պահանջում էր Հայաստանը՝ ՀԱՊԿ-ի երևանյան ժողովի ժամանակ։ Ըստ Լավրովի տրամաբանության ի՞նչ է ստացվում՝ ՀՀ-ի տարածքների զավթումը Ադրբեջանի կողմից ճիշտ է և դատապարտելի չէ, քանի որ ժամանակին էլ Հայաստա՞նն էր «օկուպացրել» Ադրբեջանի տարածքները։ Ադրբեջանագետ, պատմական գիտությունների թեկնածու Տաթևիկ Հայրապետյանը Factor TV-ի հետ հարցազրույցում ասում է, որ Լավրովը մի քանի խնդիր է փորձում լուծել այսպիսով․
«Սա ադրբեջանամետ առաջին ձևակերպումը չէ, որ Սերգեյ Լավրովը հրապարակայնորեն օգտագործում է։ Նախկինում էլ անընդհատ կրկնում էր «հետկոնֆլիկտային իրավիճակ» ասվածը։ Այստեղ խնդրահարույցն այն է, որ ԵԱՀԿ Մինսկի խմբի անդամ ՌԴ-ն, բացի մեր դաշնակիցը լինելուց, տասնամյակներով նշել է երեք սկզբունք՝ ուժի չկիրառում, տարածքային ամբողջականություն, ինքնորոշման իրավունք, հիմա ինքը փաստացի ընդունում է ռազմական ճանապարհով հարցեր լուծելու մեթոդը։ Սա լուրջ խնդիր է։ Մյուս խնդիրը, որ փորձում է լուծել Լավրովը, թաքցնելն է ՌԴ-ի բանակցային բացթողումները։ Ինքը մեղադրում է ՀՀ նախկին իշխանություններին, որ լուծման չէին գնում, բայց հայտնի է, որ ՀՀ-ն Կազանում գնում էր լուծման, բայց Ալիևն է ձախողել, և նախկինում ռուսական կողմը բաց խոսում էր սրա մասին»,- նշեց Տաթևիկ Հայրապետյան։ Ըստ նրա՝ գործ ունենք Ադրբեջանի և Ռուսաստանի շահերի համընկնման հետ։
Հարցազրույցն ամբողջությամբ՝ տեսանյութում։
Ռոբերտ Անանյան
