14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
ԱՄՆ օրենսդիրները զգուշացնում են Ադրբեջանի՝ Լաչինի միջանցքի շրջափակման «աղետի» մասին․ Axios
Քաղաքականություն
04.02.2023 | 12:50
ԱՄՆ Ներկայացուցիչների պալատի օրենսդիրներ Ադամ Շիֆը և Ֆրենկ Փալոնը նախօրեին միացել են ցուցարարներին Կապիտոլիումի մոտ՝ կոչ անելով ԱՄՆ-ին պատասխանատվության ենթարկել Ադրբեջանին` Ղարաբաղի ժողովրդի դեմ մարդու իրավունքների ոտնահարման համար և կոչ անում աջակցել ներկայացված երկկուսակցական բանաձևին, գրում է Axios-ը։
Բանաձևը, որի նպատակն է ճեղքել Ադրբեջանի շրջափակումը, կոչ է անում անհապաղ դադարեցնել ԱՄՆ-ի ցանկացած ռազմական կամ անվտանգության աջակցություն Ադրբեջանին, դիմում ԱՄՆ ղեկավարությանը՝ միջազգային դատարաններին Ադրբեջանի ռազմական հանցագործությունները հետաքննելու և տուժածներին մարդասիրական օգնություն տրամադրելու խնդրանքով։
«ԱՄՆ-ի աջակցությունը պատերազմ հրահրող Ալիևին պետք է դադարեցվի։ Ոչ մի լումա Ադրբեջանին, պատերազմական այս հանցագործին, որը պատերազմ է մղում խաղաղ ժողովրդի դեմ»,- ասել է Ադամ Շիֆը։
Կոնգրեսական Քեթի Փորթերն էլ այս շաբաթ Բայդենի վարչակազմին կոչ է արել անհապաղ քայլեր ձեռնարկել շրջափակումը դադարեցնելու և Ադրբեջանին տրամադրվող ԱՄՆ ռազմական օգնությունը դադարեցնելու համար:
«Ամերիկացի հարկատուները չպետք է սուբսիդավորեն Ադրբեջանի մշտական ագրեսիան հայ ժողովրդի դեմ», – ասել է նա Ներկայացուցիչների պալատում:
Կոնգրեսի Ներկայացուցիչների պալատի արտաքին հարաբերությունների հանձնաժողովի նախագահ, կոնգրեսական Մայքլ Մաքքոլն էլ ասել է, որ անհանգստացած է հումանիտար ճգնաժամի վատթարացմամբ և կոչ է արել Ադրբեջանի կառավարությանը «նպաստել բացարձակապես անխոչընդոտ ազատ ելումուտին»:
Հավելենք, որ արդեն 54-րդ օրն է Ադրբեջանի իշխանությունները փակ են պահում Արցախը Հայաստանին կապող Լաչինի միջանցքը։
Էմմա Չոբանյան
