Ռուսաստանն Ուկրաինայում շուրջ 200,000 մարդու կորուստ ունի, այդ թվում` վիրավորների. The New York Times

ԱՄՆ-ի ու արևմտյան այլ  երկրների պաշտոնյաները կարծում են, որ Ուկրաինայում զոհված ու վիրավոր ռուս զինծառայողների թիվը մոտենում է 200 հազարի սահմանագծին, գրում է BBC-ի ռուսական ծառայությունը՝  հղում անելով The New York Times-ին։

Նշվում է, որ ռուսական կորուստները զգալիորեն աճել են Բախմուտի ու Սոլեդարի մարտերի ընթացքում։

Քանի որ Մոսկվային անհրաժեշտ է մեծ հաղթանակ, և նա Բախմուտը տեսնում է որպես ամբողջ արևելյան Դոնբասի գրավման բանալի, վատ պատրաստված նորակոչիկներն ու նախկին բանտարկյալներն են ուղարկվել առաջնագիծ: Արդյունքում, ըստ ԱՄՆ պաշտոնյաների, օրական հարյուրավոր զինվորականներ են զոհվում կամ վիրավորվում։

Նման կորուստներ է կրում և ուկրաինական կողմը՝ չնայած իրական թվերը դժվար է պարզել։ Ըստ լրատվամիջոցի՝ նաև այն պատճառով, որ Կիևը դրանք չի բացահայտում։ Ավելի պատրաստված հետևակային կազմավորումները պահվում են պահեստազորում, մինչդեռ ավելի քիչ պատրաստված զորքերը, այդ թվում՝ տարածքային պաշտպանության ստորաբաժանումները, առաջնագծում են։

ԱՄՆ-ի կողմից զոհերի վերջին հրապարակային գնահատականը տրվել է անցած նոյեմբերին, երբ միացյալ շտաբների պետերի ղեկավար Մարկ Միլին նշել էր, որ պատերազմի սկզբից ի վեր կողմերից յուրաքանչյուրը կորցրել է ավելի քան 100,000 զինվորական՝ զոհված և վիրավորված:

«Ես կասեի, որ այժմ այս ցուցանիշը գերազանցում է 100,000-ը»,- ասել էր  Միլին հունվարին կայացած մամուլի ասուլիսում:

Այս շաբաթ էլ բարձրաստիճան ամերիկացի պաշտոնյաները հայտարարել են, որ իրենց կարծիքով, Ռուսաստանի կորուստները մոտենում են 200,000-ին։ Սա ութ անգամ ավելին է, քան ամերիկացիների կորուստներն Աֆղանստանում երկու տասնամյակ շարունակվող պատերազմի ընթացքում։

Էմմա Չոբանյան