Սեյրան Օհանյանը կանչվել է հարցաքննության և մոտակա օրերին օր ու ժամ է նշանակված. ՊԵԿ նախագահ

ՊԵԿ նախագահ Դավիթ Անանյանը լրագրողների հետ զրույցում տեղեկացրեց, որ «Երևան» հիմնադրամը ստացված գումարների մասին ՊԵԿ-ին համապատասխան տեղեկատվություն չի ներկայացրել: Այս մասին այսօր կառավարության նիստից առաջ պատասխանելով Factor.am-ի հարցին՝ ասաց Պետական եկամուտների կոմիտեի նախագահ Դավիթ Անանյանը։

ՊԵԿ նախագահը չհամաձայնեց մեր այն դիտարկմանը, որ պատճառը ՊԵԿ-ի անգործությունից է բխել: Անանյանը տեղեկացրեց՝ հիմնադրամները բավականին շատ են, և ՊԵԿ-ն այս պահին բոլոր ուղղություններով աշխատում է:

«Այն հիմնադրամները, որոնք պարտավոր էին օրենքով ներկայացնել համապատասխան տեղեկատվություն, բայց չեն ներկայացրել, մեր վարչական վարույթի շրջանակներում վարչական տուգանքի կենթարկվեն»,- ընդգծեց Դավիթ Անանյանը։

ՊԵԿ նախագահն անդրադարձավ նաև պաշտպանության նախկին նախարար Սեյրան Օհանյանին հարցաքննության կանչելուն և Օհանյանի այն հայտարարությանը, թե ինքը պատշաճ ծանուցում չի ստացել։ «Ծանուցումը պարոն Օհանյանին ուղարկվել է հունիս 12-ին, հունիս 13-ին նա հայտարարել է, որ ծանուցում չի ստացել: 2 տեղեկատվություններն էլ կարող են իրականություն լինել, այսինք՝ հնարավոր է, որ ամսի 12-ին ուղարկված ծանուցումը պարոն Օհանյանը 13-ին դեռևս ստացած չլինի: Օհանյանը կանչվել է հարցաքննության, և մոտակա օրերին օր ու ժամ է նշանակված»,- շեշտեց Անանյանը։

Ըստ Անանյանի՝ պաշտպանության նախկին նախարարը միակ բարձրաստիճան պաշտոնյան չէ, որ քրեական գործի շրջանակում վկայի կարգավիճակով պետք է կանչվի հարցաքննության՝ միևնույն ժամանակ հրաժարվելով այլ պաշտոնյաների անուններ հրապարակել։

Մանրամասները՝ տեսանյութում։

Տեսանյութը՝ շուտով։