07.06.2026 | 00:08
Ձերբակալվել է Բյուրական համայնքի նախկին ղեկավար Զարզանդ Գրիգորյանը
Միացյալ Թագավորության Եվրոպայի հարցերով նախարարն ընդգծել է Լաչինի միջանցքի անհապաղ բացման անհրաժեշտությունը
Քաղաքականություն
01.02.2023 | 13:28
Միացյալ Թագավորության Եվրոպայի հարցերով պետնախարար Լեո Դոքերթին նախօրեին Համայնքների պալատում հարցուպատասխանի ժամանակ անդրադարձել է նաև Լաչինի միջանցքի փակմանը՝պատասխանելով պատգամավորների հարցերին։
«Մենք ձգտում ենք վերադառնալ բանակցություններին և Լեռնային Ղարաբաղի հակամարտության խաղաղ կարգավորմանը։ Հունվարի 18-ին ես խոսել եմ Հայաստանի արտգործնախարար Միրզոյանի հետ այնտեղ հումանիտար իրավիճակի վերաբերյալ, և երեկ հանդիպել եմ Ադրբեջանի դեսպանին և նշել Լաչինի միջանցքի անհապաղ վերաբացման հրատապ անհրաժեշտությունը։ «Սթարթ» հիմնադրամը, որի համար Միացյալ Թագավորությունը նշանակալից դոնոր է, հատկացրել է 350,000 ֆունտ ստերլինգ՝ իրավիճակից տուժածներին աջակցելու համար»,-ասել բրիտանացի նախարարը։
Նա հայտնել է, որ պատրաստվում է այցելել տարածաշրջան։ «Այն, ինչը մենք պնդում ենք, դա բանակցություններին վերադառնալն է և այս հակամարտության խաղաղ կարգավորումը։ Ես մեկնելու եմ տարածաշրջան առաջիկա ամիսներին ու կընդգծեմ դա։ Մենք հուսով ենք, որ երկու կողմերն էլ կվերադառնան բանակցությունների սեղանի շուրջ, և մենք կօգտագործենք մեր տրամադրության տակ եղած բոլոր գործիքները՝ ապահովելու, որ տարածաշրջանից դուրս ապակայունացնող ազդեցություններ չլինեն»,-ասել է Դոքերթին։
Էմմա Չոբանյան
