09.10.2026 | 13:56
ԱԱԾ-ն հերքում է ադրբեջանցիների ներթափանցումը Սյունիք
ԱՄՆ-ն Ուկրաինային կտրամադրի 150 կմ հեռահարության հրթիռներ․ Reuters
Քաղաքականություն
01.02.2023 | 14:25
Reuters-ը, հղում անելով ԱՄՆ ղեկավարության իրազեկ աղբյուրներին, հայտնում է, որ ԱՄՆ-ը մտադիր է մոտ ապագայում Ուկրաինային փոխանցել մինչև 150 կմ հեռահարությամբ հրթիռներ։ Reuters-ը, պարզաբանելով իր նախորդ հոդվածը, գրում է, որ ռազմական օգնության նոր փաթեթը կներառի Ground Launched Small Diameter Bomb (GLSDB) ճշգրիտ կառավարվող հրթիռներ։ Ամերիկաշվեդական արտադրության այս հրթիռները բազմաֆունկցիոնալ են, կարող են արձակվել նաև HIMARS կայանքներից և խոցել շարժվող թիրախներ մեծ հեռավորության վրա:
Մինչ այժմ ուկրաինական բանակին ամերիկացիների և այլ դաշնակիցների կողմից մատակարարվող հրթիռների խոցման շառավիղը շատ քիչ էր գերազանցում 80 կիլոմետրը․ դրանք նույնպես հրթիռներ էին HIMARS կայանքների համար։
Ուկրաինան երկար ժամանակ ԱՄՆ-ից և դաշնակիցներից խնդրում է մինչև 300 կիլոմետր հեռահարության բարձր ճշգրտության ATACMS հրթիռներ, որոնք կարող են արձակվել HIMARS կայանքներից: Մինչ այժմ արևմտյան դաշնակիցները հրաժարվում էին նման զինատեսակներ փոխանցել՝ ոչ պաշտոնական տվյալների համաձայն, քանի որ մտավախություն ունեն, որ ուկրաինացիները կսկսեն խոցել թիրախները Ռուսաստանի տարածքի խորքում, ինչը կարող է հանգեցնել պատերազմի անվերահսկելի էսկալացիայի։
Reuters-ի տվյալներով՝ 2,2 միլիարդ դոլար արժողությամբ ռազմական օգնության նոր փաթեթի մասին կհայտարարվի արդեն այս շաբաթ:
Տաթև Ֆռանգյան
