29.10.2026 | 17:01
Կարիերայի առաջին քայլերը՝ IDBank-ի հետ․ մեկնարկել է IDream-ի 16-րդ շրջափուլը
Զելենսկին հայտնել է Դոնեցկի մարզում «չափազանց լուրջ իրավիճակի մասին»
Քաղաքականություն
30.01.2023 | 12:34
Ուկրաինայի նախագահ Վլադիմիր Զելենսկին իր երեկոյան ուղերձում ասել է, որ Դոնեցկի մարզում ռուսական զորքերն անընդհատ փորձում են գրոհել ուկրաինացի զինվորականների դիրքերը։
«Իրավիճակը չափազանց լուրջ է։ Դոնեցկի մարզում Բախմուտի, Ուգլեդարի ու այլ ուղղություններով ռուսական չդադարող գրոհներ են, մեր պաշտպանությունը ճեղքելու մշտական փորձեր։ Թշնամին չի հաշվում մարդկանց ու, չնայած իր բազմաթիվ կորուստներին, պահպանում գրոհների բարձր ինտենսիվությունը»,-ասել է Զելենսկին։
Վերջին շաբաթների ընթացքում ամենակատաղի մարտերը ընթանում են Դոնեցկի մարզում՝ Բախմուտ քաղաքի մոտ, որը ռուսական բանակը փորձում է գրավել արդեն մի քանի ամիս, ինչպես նաև ռազմավարական նշանակություն ունեցող Ուգլեդար քաղաքի մոտ, որը գտնվում է Զապորոժիեի շրջանի սահմանին։
Զելենսկու խոսքով՝ ստեղծված իրավիճակում հատկապես կարևոր է արագ ռազմական օգնություն ստանալ արևմտյան գործընկերներից, քանի որ Ռուսաստանը երկարաձգվող պատերազմի հույս ունի։
«Մատակարարումների արագությունը եղել և լինելու է այս պատերազմի առանցքային գործոններից մեկը»,- ասել է Զելենսկին։
Անցյալ շաբաթ Ուկրաինայի արևմտյան դաշնակիցները, այդ թվում՝ ԱՄՆ-ը և Գերմանիան, առաջին անգամ հայտարարեցին Ուկրաինայի զինված ուժերին տանկեր մատակարարելու մտադրության մասին։ Դրանից հետո ուկրաինացի պաշտոնյաները հայտարարեցին, որ մտադիր են հասնել արևմտյան կործանիչների մատակարարմանը։
Տաթև Ֆռանգյան
