Մեր հասարակությունն ապրում է պատրանքների սպառմամբ. ապաքաղաքական զրույց Լևոն Զուրաբյանի հետ. ՏԵՍԱՆՅՈՒԹ

Factor TV-ի A-politic հաղորդաշարի հյուրն է «Հայ ազգային կոնգրես» կուսակցության փոխնախագահ, քաղաքական վերլուծաբան Լևոն Զուրաբյանը: Նրա կարծիքով՝ հասարակական գործընթացները չեն կարող պայմանավորված լինել ազգի ԴՆԹ-ով՝ դա վողուց մերժված սոցիալ-դարվինիզմի տեսությունն է: Պատասխանելով այն հարցին՝ արդյո՞ք աշխարհագրական բաղադրիչներն ազդում են քաղաքականության վրա, հաղորդման հյուրն տեսակետ է հայտնում, որ այդ գործոնները չի կարելի ամբողջությամբ անտեսել, բայց պետության զարգացման համար առանցքային է նոր տեխնոլոգիաների մշակումը կամ կլանումը, ժամանակակից քաղաքակրթական արժեքների ստեղծումը:

Որտե՞ղ են ավարտվում քաղաքական իրատեսությունը, պրագմատիզմը և սկսվում է ցինիզմը, արժեքներին դավաճանելը, անբարոյականությունը: Ըստ Լևոն Զուրաբյանի՝ այդ հարցին վաղուց արդեն պատասխանել է Նիկոլո Մաքիավելին՝ ասելով, որ պետության ղեկավարը պետք է հնարավորինս ազնիվ ու պարկեշտ լինի, եթե դա չի հակասում պետական շահերին: Այդ համատեքստում հաղորդման հյուրն անդրադարձել է զիջումների գնալու խնդրին: Նրա կարծիքով՝ թույլի զիջումը «խաղաղեցման» որևէ ազդակ չի կարող հաղորդել հակառակ կողմին, հակառակը՝ խրախուսում է նրա ագրեսիվությունը:

Ինչպե՞ս հաղթահարել պատմական տրավման: Զուգահեռ անցկացնելով Հայաստանի և Իսրայելի միջև (և վերապահում անելով, որ այդ տիպի բոլոր համեմատությունները պայմանական են)՝ ՀԱԿ փոխնախագահն այն կարծիքն է հայտնվում, որ տրավման չպիտի ազդի պետությունների այսօրվա գործողությունների վրա: Հաղորդման հյուրը հիշեցնում է, որ հաղթելով երկու պատերազմներում՝ Իսրայելը, այնուամենայնիվ, զիջել է Եգիպտոսին Սինայի թերակղզին՝ համարելով, որ այդպիսով ապահովվում է երկրի անվտանգությունը:

Մանրամասները՝ տեսանյութում:

Արամ Աբրահամյան