17.05.2026 | 20:32
ՆԱՏՕ-ի ինքնաթիռները Լատվիայում օդ են բարձրացվել անօդաչու թռչող սարքի պատճառով
Ռուսական կողմը պատրաստ է կազմակերպել ՀՀ-ի և Ադրբեջանի ԱԳ նախարարների եռակողմ հանդիպումը․ Զախարովա․ ՏԵՍԱՆՅՈՒԹ
Քաղաքականություն
27.01.2023 | 16:34
Ռուսական կողմը պատրաստ է կազմակերպել Հայաստանի և Ադրբեջանի ԱԳՆ ղեկավարների եռակողմ հանդիպումը։ Այս մասին ամենշաբաթյա ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
«Մենք կարծում ենք, որ տեղում պարբերաբար ծագող բարդությունները չպետք է դառնան խոչընդոտ, բանակցային գործընթացի սառեցման պատճառ։ Պետք է ինչ-որ կերպ վերսկսել աշխատանքները բոլոր ուղիներով նորմալացման համար, այդ թվում՝ տրանսպորտային հաղորդակցությունների ապաշրջափակում, սահմանազատում, խաղաղության պայմանագրի կնքում և քաղաքացիական հասարակության գծով շփումներ»,- հավելել է նա։
Անդրադառնալով Լաչինի միջանցքում տիրող իրավիճակին՝ Զախարովան ընդգծել է, որ ՌԴ Պաշտպանության նախարարությունը ԼՂ-ում խաղաղապահների հրամանատարության հետ, ԱԳՆ-ի հետ համագործակցությամբ մշտական կապի մեջ է բոլոր շահագրգիռ կողմերի հետ։
Նրա խոսքով՝ «ի տարբերություն արտաքին խաղացողների մեծ մասի, որոնք սահմանափակվում են ապաէսկալացիայի կոչերով, հայտարարություններով, Ռուսաստանը տեղում լուծումներ է փնտրում և մարդասիրական օգնություն է ցուցաբերում»։
«Մենք կոչ ենք անում ամբողջությամբ ապաշրջափակել Լաչինի միջանցքը՝ համաձայն Ռուսաստանի, Հայաստանի և Ադրբեջանի ղեկավարների 2020 թվականի նոյեմբերի 9-ի հայտարարության: Եվ մենք դիմում ենք Բաքվին և Երևանին՝ քաղաքական կամք դրսևորելու՝ առկա տարաձայնությունները լուծելու համար»,- ասել է նա։
Մանրամասները՝ տեսանյութում։
Տաթև Ֆռանգյան
