Փողոցներում շրջիկ երաժիշտների գործունեությունը կկանոնակարգվի․ կսահմանվեն տույժեր․ ՏԵՍԱՆՅՈՒԹ

ԱԺ տարածքային կառավարման, տեղական գյուղատնտեսության և շրջակա միջավայրի պահպանության հարցերի հանձնաժողովում քննարկվում է «Երևան քաղաքում տեղական ինքնակառավարման մասին» օրենքում լրացում կատարելու նախագծերի փաթեթը:

Փողոցներում ստեղծագործական ելույթների կանոնակարգման լիազորությունները կվերապահվեն համայնքի ավագանուն, որը կսահմանի բացօթյա վայրերում փողոցներում, մայթերին, հրապարակներում, այգիներում, պուրակներում և այլ տեղերում, մշակութային գործունեության իրականացման կարգը: Խոսքը վերաբերում է շրջիկ երաժիշտներին, նկարողներին, երգող-պարողներին և նմանատիպ գործունեություն իրականացնողներին: Այս մասին նշեց ՀՀ տարածքային կառավարման և ենթակառուցվածքների նախարարի տեղակալ Վաչե Տերտերյանը։

Առաջարկվում է, որ Երևանում և համայնքներում այսուհետև այդպիսի գործունեության իրականացման պայմաններն ու պահանջները սահմանեն համայնքների ավագանիները: Այսինքն` կախված համայնքի կամ բնակավայրի առանձնահատկություններից` սահմանվեն կանոններ և վարչական իրավախախտումների համար նախատեսված տույժեր:
Առաջարկվում է սահմանել տույժ` նվազագույն աշխատավարձի 100- ապատիկի, իսկ կրկնվելու դեպքում 200-ապատիկի չափով: Նախատեսվում է նաև անձնական սեփականության գործիքների բռնագանձում։

Փոխնախարարի խոսքով՝ այս խնդիրը միշտ եղել է, սակայն վերջերս, կապված տուրիստական ակտիվ հոսքի հետ, գործունեություն են ծավալում մարդիկ, որոնց աշխատանքը չի կանոնակարգվում: Այդպիսի վայրերից են Հյուսիսային պողոտան, Հանրապետության հրապարակը, Գառնու տաճարի հարակից հատվածը, Գեղարդի տաճարի մուտքը, Գյումրիի հրապարակի հարակից տարածքները և այլն։ «Մինչև ուշ գիշեր ականատես ենք լինում անհասկանալի տպավորություն ձևավորող բաների, էլ չասած՝ տեսքի ու ճաշակի»,- նշեց Տերտերյանը:

Մանրամասները՝ տեսանյութում։