16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
ՀՀ դրոշի գործածման պահանջները խախտելու դեպքերին առնչվող նոր օրինագիծ է շրջանառվում
27.01.2023 | 15:16
«ՀՀ դրոշի մասին» օրենքում և «Վարչական իրավախախտումների վերաբերյալ» օրենսգրքում փոփոխություններ են նախատեսվում։ Արդարադատության նախարարության առաջարկած օրենքի նախագծով սահմանվում են դրոշի գործածության նոր պահանջներ։ Փաստաթղթի նախագիծը հրապարակվել է е-draft էլեկտրոնային հարթակում։ Ըստ օրենքի հիմնավորման՝ պետք է հստակեցնել դրոշին ներկայացվող պահանջները, մասնավորապես՝ ՀՀ դրոշի ամբողջական, մաքուր և չգունաթափված լինելու պահանջը սահմանել որպես ընդհանուր պահանջ: Բացի այդ, նախագծով սահմանված է նաև դրոշին ներկայացվող պահանջները խախտելու դեպքում պատասխանատվության ենթակա սուբյեկտների շրջանակը։
Առանձնացվում է ֆիզիկական, իրավաբանական և պաշտոնատար անձանց կողմից կատարված վարչական իրավախախտումների համար սահմանված պատասխանատվության չափ։
Դեռևս 2022-ի մարտին «Վարչական իրավախախտումների վերաբերյալ» ՀՀ օրենսգրքում կատարվել են լրացումներ, որոնցով վարչական պատասխանատվություն է սահմանվել դրոշին ներկայացվող պահանջները խախտելու համար։ Տուգանքի չափը նշանակված է եղել 30-ից 50 հազար դրամ։
Դրոշին ներկայացվող պահանջները և այդ պահանջները չպահպանելու համար վարչական պատասխանատվությունը վերաբերում են Հանրապետության նախագահի նստավայրի, կառավարության, դատարանների, մարզական, մշակութային կազմակերպությունների և օրենքով սահմանված այլ շենքերի վրա բարձրացված դրոշներին։ Նախագծով ներկայացվող պահանջները չեն վերաբերում պաշտոնատար անձանց աշխատասենյակներում կամ օրենքով նախատեսված փոխադրամիջոցների վրա ամրացված դրոշներին։
Անի Թամրազյան
