27.06.2026 | 19:03
ԲՀԿ-ի համար ակնհայտ է՝ որևէ հաշվարկի դեպքում 4%-ի շեմը չի կարող համարվել հաղթահարված. Սուրեն Գրիգորյան․ ՏԵՍԱՆՅՈւԹ
1 մլրդ դրամը, առանձնատունը և ամառանոցն ապօրինի՞ են. Օհանյանը չի ընդունում դատախազության հայցը․ ՏԵՍԱՆՅՈւԹ
Քաղաքականություն
26.01.2023 | 20:00
«Լեքսուս» ավտոմեքենա, խոշոր անշարժ գույքեր Երևանի Կենտրոն վարչական շրջանի Նալբանդյան փողոցում, Վահագնի թաղամասում, զավթված 1 հա ափամերձ տարածք Սևանա լճի մերձակայքում, ինչպես նաև 1 միլիարդ 78 միլիոն դրամ. ըստ Գլխավոր դատախազության` ՀՀ պաշտպանության նախկին նախարար Սեյրան Օհանյանի գույքից և ֆինանսական միջոցներից այսքանը ձեռք է բերվել ապօրինի ճանապարհով։
Պաշտպանության նախկին նախարարն այսօր թեև միայնակ՝ նույնիսկ առանց փաստաբանների էր ներկայացել Հակակոռուպցիոն դատարան, սակայն ապօրինի ծագման գույքի բռնագանձման գործով միայնակ չի անցնում։ Նրա հետ պատասխանողի աթոռին են հայտնվել կինը՝ Ռուզաննա Խաչատրյանը, վերջինիս քրոջ աղջիկը՝ Աննա Բադալյանը և ՀՀ-ում Ֆրանսիայի նախկին հյուպատոս Ժակ Պիեռ Ֆովոն։ Ըստ Դատախազության՝ նշված անձանց անունով գրանցված գույքի իրական սեփականատերը Սեյրան Օհանյանն է։
Ըստ հայցի՝ Օհանյանի ցուցմամբ՝ Սևանա լճի ափամերձ հատվածքում զավթվել է 1 հեկտար տարածք: Նախկին նախարարը, սակայն, ընդհատեց Քոչարյանին՝ հայտարարելով, որ ներկայացված գույքերն իրեն չեն պատկանում:
Դատական նիստն այսքանով հետաձգվեց: ՊՆ նախկին ղեկավարը հեռացավ դատարանից:
Օրեր առաջ հայտնի դարձավ, որ գլխավոր դատախազ Աննա Վարդապետյանն ԱԺ նախագահ Ալեն Սիմոնյանին է ներկայացրել Օհանյանի նկատմամբ քրեական հետապնդում հարուցելու համաձայնություն տալու մասին երեք միջնորդագիր, որոնց կցվել է նաև պատգամավորի նկատմամբ քրեական հետապնդում հարուցելուն համաձայնություն տալու մասին Ազգային ժողովի որոշման նախագիծը:
«Պաշտպանության նախկին նախարարը, օգտագործելով պաշտոնեական դիրքը, երկու դրվագով կատարել է առանձնապես խոշոր չափերով վատնում, պաշտոնեական դիրքն օգտագործել է ծառայության շահերին հակառակ, որն անզգուշությամբ առաջացրել է ծանր հետևանքներ։ Երկրորդ վարույթով ձեռք բերված տվյալների համաձայն՝ Օհանյանը խմբային շահերից ելնելով՝ պաշտոնեական դիրքն օգտագործել է ծառայության շահերին հակառակ, չի կատարել ծառայողական պարտականությունները, որն անզգուշությամբ առաջացրել է ծանր հետևանքներ, նաև վատնելու եղանակով հափշտակել է առանձնապես խոշոր չափերի գույք: Երրորդ քրեական վարույթով էլ նախկին նախարարը վատնելու եղանակով հափշտակել է առանձնապես խոշոր չափերի գույք»,- նշվում է գերատեսչության հայտարարության մեջ:
Սեյրանին Օհանյանին պատգամավորական անձեռմխելիությունից զրկելու և նրան մեղադրանք առաջադրելու մասին տեղեկությունները շրջանառվում էին դեռ ամիսներ առաջ։ Շուրջ ութ տարի Պաշտպանության նախարարությունը ղեկավարած Օհանյանն իր նկատմամբ իրականացվող գործընթացը որակում է շոու։
Մանրամասները՝ տեսանյութում։
Ռոզա Վարդանյան
