16.01.2026 | 23:30
Ավարտվել է Հայաստանի շախմատի տղամարդկանց և կանանց առաջնությունների 4-րդ խաղափուլը
Ինչո՞ւ այս սահմանը չի բացվում․ Կարո Փայլանը Թուրքիա-Հայաստան սահմանին դիմել է Էրդողանին․ ԼՈՒՍԱՆԿԱՐՆԵՐ
Քաղաքականություն
26.01.2023 | 13:04
Թուրքիայի խորհրդարանի քրդամետ Ժողովուրդների դեմոկրատական կուսակցության հայազգի պատգամավոր Կարո Փայլանը նախօրեին հայ-թուրքական սահման է այցելել՝ երկրի նախագահ Ռեջեփ Թայիփ Էրդողանին փակ սահմանի մասին հարցնելով․ «Ի՞նչն է խանգարում այս սահմանը բացել»։
Թուրքական լրատվամիջոցների հաղորդմամբ՝ Փայլանն առաջարկել է սահմանի դարպասն անվանակոչել Հրանտ Դինքի անունով։
«Մենք գտնվում ենք Թուրքիա-Հայաստան սահմանին և, ցավոք, այս սահմանը փակ է 30 տարի: Ադրբեջանցիները, հայերը, թուրքերը և քրդերն այս տարածաշրջանի ժողովուրդներն են, բայց, ցավոք, նրանք բաժանվեցին անցյալ դարի տրավմաների պատճառով։ Հիմա ժամանակն է, որ թուրքերը, հայերը, քրդերը գրկեն միմյանց, երկու տարի առաջ պատերազմ էր Ադրբեջանի և Հայաստանի միջև։ Այդ պատերազմի ավարտից հետո սկսվեց և՛ Թուրքիա-Հայաստան, և՛ Ադրբեջան-Հայաստան խաղաղության գործընթացը։ Թուրքիան և Հայաստանը նշանակեցին հատուկ բանագնացներ և սկսեցին բանակցությունները»,- ասել է Փայլանը՝ հիշեցնելով, որ մեկ տարի առաջ նախագահ Էրդողանն ասել էր, որ սահմանը կարող է բացվել նախ երրորդ երկրների, ապա՝ Թուրքիայի և Հայաստանի քաղաքացիների համար։
«Ես հարցնում եմ նախագահ Էրդողանին, թե ինչո՞ւ այս սահմանը բաց չէ։ Ի՞նչն է խանգարում ձեզ այս սահմանը բացել։ Կորցնում են և՛ Հայաստանը, և՛ տարածաշրջանի բնակիչները։ Կարսը, Իգդիրը, Արդահանը, Աղրին, Դողուբայազետն են կորցնում։ Այս տարածքի շրջաններն ու ապրող մարդիկ կորցնում են»,- ասել է Փայլանը։
Նա նշել է, որ եթե սահմանը բացվի, երկրների միջև առևտուր և զբոսաշրջություն կլինի։
«Թուրքերը, քրդերը, ադրբեջանցիները, հայերը մարդիկ են, որոնք հազարավոր տարիներ միասին են ապրել, և հիմա եկել է միմյանց գրկելու ժամանակը։ Հրանտ Դինքն այն մարդկանցից մեկն էր, որը ամենամեծ ջանքերն է գործադրել Թուրքիա-Հայաստան սահմանը բացելու համար, նրա ամենամեծ երազանքն այս սահմանի բացումն էր»,- ասել է հայազգի պատգամավորը։
Էմմա Չոբանյան
