15.01.2025 | 14:35
Մենք ենք բերել, մենք էլ ցտեսություն կասենք. քաղաքացին` իշխանությունների մասին․ ՏԵՍԱՆՅՈՒԹ
Պաշտոնական Բաքուն արձագանքել է Եվրոպական խորհրդարանում Արարատ Միրզոյանի ելույթին
Քաղաքականություն
26.01.2023 | 12:49
ՀՀ ԱԳ նախարար Արարատ Միրզոյանի հունվարի 24-ի ելույթը Եվրոպական խորհրդարանի արտաքին կապերի կոմիտեում Բաքվում դժգոհություն է առաջացրել։ Ադրբեջանի ԱԳՆ-ն այս ելույթի առնչությամբ հայտարարության է տարածել և այն անվանել «կեղծավորության վառ օրինակ»։ Ադրբեջանական կողմն իր սովորությանը համաձայն խեղաթյուրել է Միրզոյանի ելույթի բովանդակությունը։
«Լաչինի ճանապարհի շուրջ ստեղծված իրավիճակը ռազմական ճանապարհով լուծելու Հայաստանի արտգործնախարարի առաջարկը լուրջ սպառնալիք է։ Այս առաջարկը ցույց է տալիս, որ Հայաստանը պատմության դասեր չի քաղել և դեռ չի գիտակցում 30 տարվա ընթացքում ադրբեջանական տարածքների «օկուպացիայի հետևանքները»։ Պետք է կանխել հայկական կողմի այս արկածախնդրությունը»,- ասվում է հայտարարության մեջ։ Հավելենք, որ իր ելույթում Արարատ Միրզոյանն իրականում նշել էր, որ Հայաստանը ընտրում է Լաչինի միջանցքի բացման դիվանագիտական ուղին՝ բացառելով ռազմական տարբերակը։
Բաքուն նշում է, որ Միրզոյանի խոսքերն այն մասին, թե Հայաստանը բարեխղճորեն մասնակցել է Ադրբեջանի նախաձեռնած երեք ուղղություններով (բոլոր տրանսպորտային հաղորդակցությունների բացում, սահմանների սահմանազատում, խաղաղության համաձայնագրի ստորագրում) խաղաղ բանակցություններին, իբր, չեն արտացոլում իրականությունը։ Հավելենք, որ Ադրբեջանը շարունակում է անարձագանք թողնել հայկական կողմի առաջարկները, որոնք ստացել է։
«Բացի այդ, հայկական կողմի հերթական հայտարարություններն այն մասին, որ Ադրբեջանը պահանջում է «արտտարածքային միջանցք», անհիմն են։ Եվս մեկ անգամ հիշեցնում ենք, որ համաձայն եռակողմ հայտարարության 9-րդ կետի Հայաստանը պարտավոր է «տրանսպորտային կապեր հաստատել Ադրբեջանի Հանրապետության արևմտյան շրջանների և Նախիջևանի Ինքնավար Հանրապետության միջև՝ կազմակերպել քաղաքացիների, տրանսպորտային միջոցների և ապրանքների անխոչընդոտ տեղաշարժը երկու ուղղություններով»,-ասվում է ԱԳՆ հայտարարության մեջ։ Այս հայտարարությամբ Բաքուն իրականում խճճվում է նախկինում արված հայտարարությունների մեջ, որոնցով պահանջում էր եռակողմ համաձայնության հետ կապ չունեցող ինչ-որ միջանցք։
Հիշեցնենք նաև, որ օրերս ԵՄ-ում Ադրբեջանի առաքելության ղեկավար, Բելգիայում և Լյուքսեմբուրգում դեսպան Վագիֆ Սադիկովը դժգոհել էր, որ Ադրբեջանի ԱԳ նախարար Ջեյհուն Բայրամովը չի հրավիրվել Բրյուսել՝ մասնակցելու Եվրախորհրդարանի արտաքին հարաբերությունների հանձնաժողովի նիստին՝ ի տարբերություն ՀՀ ԱԳ նախարար Արարատ Միրզոյանի։
Էմմա Չոբանյան
