15.01.2025 | 15:16
«Հայ ազգային կոնգրեսը» կմիանա՞ Մարությանին․ Զուրաբյանը չբացառեց․ ՏԵՍԱՆՅՈՒԹ
Բաթումիում հարձակման է ենթարկվել Վրաստանի նախկին վարչապետ Գիորգի Գախարիան
Քաղաքականություն
15.01.2025 | 11:41
Բաթումիի «Շերատոն» հյուրանոցում հարձակման է ենթարկվել Վրաստանի ներքին գործերի նախկին նախարար, նախկին վարչապետ, այժմ ընդդիմադիր «Հանուն Վրաստանի» կուսակցության հիմնադիր Գիորգի Գախարիան։ Միջադեպից հետո Գախարիան տեղափոխվել է տեղի հիվանդանոց, որտեղ ստացել է բժշկական օգնություն և նախնական հետազոտություններ անցել, գրում է Эхо Кавказа-ն։
«Մթիս ամբեբի»-ի խմբագիր Գելա Մթիվլիշվիլին, որն ականատես է եղել միջադեպին, տեղի ունեցածի մասին տեղեկություններ է տարածել սոցիալական ցանցերում։
«Մի քանի րոպե առաջ Բաթումիում՝ «Շերատոն» հյուրանոցում, ռուսական վարչակարգի ոչ լեգիտիմ խորհրդարանի անդամ Դմիտրի Սամխարաձեն, Աջարիայի էկոնոմիկայի փոխնախարար Գեորգի Մանվելիձեն և այլք (ենթադրաբար՝ Վառլամ Լիպարտելիանին) հարձակվել են Գիորգի Գախարիայի վրա, որը մնում էր նույն հյուրանոցում։ Գախարիային տեղափոխել են կլինիկա»,- գրել է Մտիվլիշվիլին և լուսանկարներ հրապարակել դեպքի վայրից։
Ավելի ուշ Բաթումիի կլինիկայի բժիշկներից մեկը լրագրողներին հայտնել է, որ Գիորգի Գախարիան քթի կոտրվածք է ստացել և ուղեղի ցնցում։ Նա բուժզննում է անցել, ապա հեռացել կլինիկայից։
ՆԳՆ-ն հարձակման փաստով հետաքննություն է սկսել Վրաստանի Քրեական օրենսգրքի 126-րդ հոդվածով («բռնություն»)։
Լրագրող Զվիադ Կորիձեն էլ հայտնել է, որ նույն խումբը հարձակվել է իր վրա՝ Գիորգի Գախարիայի վրա հարձակումից առաջ։ Նա ժամանել է Բաթումի՝ լուսաբանելու Batumelebi և Netgazeti լրատվականների հիմնադիր Մզիա Ամագլոբելիի դատավարությունը։ Լրագրողը գտնվել է «Շերատոն» հյուրանոցում, երբ Դմիտրի Սամխարաձեն մոտեցել է նրան, ասել, որ ճանաչել է իրեն ու սկսել հայհոյել։ Այդ պահին մոտ 10 մարդ շարժվել է իր ուղղությամբ, պնդում է Կորիձեն։
Նա օգնություն է խնդրել տեղի անվտանգության աշխատակցից և ինչ-որ պահի հարված է ստացել գլխին։ Դրանից հետո նրան ուղեկցել են իր սենյակ։
Թարգմանությունը՝ Էմմա Չոբանյանի
