Քաղաքականություն
25.01.2023 | 20:43
Բեռլին-Բրանդենբուրգ օդանավակայանում (BER) հունվարի 25-ին գործադուլը հանգեցրել է բոլոր ուղևորատար չվերթների չեղարկման: Օդանավակայանի վարչակազմի տվյալներով՝ չեղարկվել է 300 թռիչք և վայրէջք, տուժել է գրեթե 35 հազար ուղևոր։ Ver.di արհմիությունը 24-ժամյա գործադուլ է հայտարարել՝ ճնշում գործադրելու վարչակազմի վրա՝ սակագնային բանակցություններում զիջումների գնալու համար, գրում է DW-ի ռուսական ծառայությունը։
Գործադուլի կոչ են արել նաև օդանավակայանի վերգետնյա տրանսպորտի ծառայությունների աշխատակիցներին, օդանավակայանի կառավարման ընկերության աշխատակիցներին և անվտանգության ծառայություններին։ Ver.di-ն հույս ուներ, որ գործադուլին կներգրավվի մինչև 6000 մարդ:
Ավիաընկերությունները, որոնց թռիչքները չեղարկվել են գործադուլի պատճառով, ուղևորներին առաջարկում են ավիատոմսերը փոխանակել գնացքի տոմսերով կամ նրանց գիշերակաց տրամադրել հյուրանոցներում։
Արհմիության ղեկավարությունը դժգոհ է երեք ոլորտներից որևէ մեկում առաջընթացի բացակայությունից՝ չնայած այն հանգամանքին, որ վարչակազմի հետ սակագնի վերաբերյալ բանակցությունները շարունակվում են արդեն մի քանի փուլով։ Ver.di-ն, ի թիվս այլ բաների, պահանջում է ամսական 500 եվրոյի չափով աշխատավարձի բարձրացում Բեռլինի օդանավակայանի կառավարման ընկերության անվտանգության աշխատակիցների և անձնակազմի համար:
Տաթև Ֆռանգյան
