08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
ՌԴ սահմանը մեքենայով հատելու համար պետք է օ՞ր ամրագրել․ նախագիծը հանվել է Պետդումայի կայքից
Քաղաքականություն
24.01.2023 | 17:01
ՌԴ Պետդումայում «Ռուսաստանում ավտոճանապարհների և ճանապարհային գործունեության մասին» օրենքում փոփոխություններ են մշակել, որոնք պարտավորեցնում են նախապես ամրագրել Ռուսաստանի սահմանը մեքենայով հատելու ամսաթիվը և ժամը։ Առաջարկություններն արել է օրենսդիր մարմնի տրանսպորտի հանձնաժողովի ղեկավար Եվգենի Մոսկվիչևը, գրում է ՌԲԿ-ն։
Նշվում է, որ փոփոխություններն առնչվելու են ինչպես Ռուսաստանի քաղաքացիներին, այնպես էլ օտարերկրացիներին և քաղաքացիություն չունեցող անձանց պատկանող մեքենաներին: Դրանք կազդեն ինչպես փոխադրողների, այնպես էլ անհատների վրա: Սահմանի հատումը կիրականացվի հաստատված օրը և ժամին՝ ՌԴ կառավարության կողմից սահմանված կարգով։
Եթե փոփոխություններն ընդունվեն, ՌԴ կառավարությունը կսահմանի ընթացակարգ, որը ներառելու է՝ ամրագրման համար անհրաժեշտ փաստաթղթերի ցանկ, սահմանային անցման հսկողություն, տրանսպորտային միջոցների կատեգորիաներ, որոնք կկարողանան անցակետերով անցնել հերթից դուրս, ճանապարհի երկայնքով տրանսպորտային միջոցների տեղադրման կարգը՝ դրանով երթևեկելու հնարավորությունն ապահովելու համար։
Փաստաթղթում ասվում է, որ փոփոխությունները պետք է ուժի մեջ մտնեն արդեն մարտի 1-ից։
BBC-ի ռուսական ծառայության հաղորդմամբ՝ լրատվամիջոցներում տեղեկությունը տարածվելուց հետո օրինագիծը հանվել է Պետդումայի կայքից։ Փոփոխությունների հեղինակ Եվգենի Մոսկվիչևը պարզաբանել է, որ դրանք վերաբերում են միայն բեռնատարներին, այլ ոչ թե թեթև մարդատար ավտոմեքենաներին, իսկ նպատակը սահմանային անցակետերում մի քանի օր հերթերում սպասելուց խուսափելն է։
ՌԴ նախագահի խոսնակ Դմիտրի Պեսկովն իր հերթին լրագրողներին ասել է, որ արտերկիր ՌԴ քաղաքացիների մեկնման արգելք Կրեմլում չի քննարկվում։
Էմմա Չոբանյան
