28.10.2026 | 23:23
Քննարկվել են Լուվրի և Հայաստանի պատմության թանգարանի միջև համագործակցության հեռանկարները
ԵՄ-ն երկու տարով քաղաքացիական առաքելություն կուղարկի Հայաստան․ Եվրոպական խորհուրդը համաձայնություն է տվել
Քաղաքականություն
23.01.2023 | 16:50
Եվրոպական խորհուրդն այսօր համաձայնություն է ձեռք բերել Հայաստանում ԵՄ քաղաքացիական առաքելության ստեղծման հարցում՝ Համընդհանուր անվտանգության և պաշտպանական քաղաքականության (CSDP) շրջանակում: Առաքելության նպատակն է՝ նպաստել Հայաստանի սահմանամերձ շրջաններում կայունությանը, տեղում վստահության ձևավորմանը և ԵՄ-ի կողմից աջակցվող Հայաստանի և Ադրբեջանի միջև հարաբերությունների կարգավորման ջանքերին նպաստող միջավայրի ապահովմանը։
«Հայաստանում ԵՄ առաքելության ստեղծումը Հարավային Կովկասում ԵՄ ներգրավվածության նոր փուլ է սկսում։ ԵՄ-ն կշարունակի աջակցել ապաէսկալացիայի ջանքերին և պարտավորվել է սերտորեն համագործակցել երկու կողմերի հետ՝ տարածաշրջանում կայուն խաղաղության վերջնական նպատակին հասնելու համար»,- ասել է ԵՄ արտաքին քաղաքականության ղեկավար Ժոզեպ Բորելը։
Նշվում է, որ ի պատասխան Հայաստանի դիմումին՝ EUMA-ն կանոնավոր պարեկություն է իրականացնելու և զեկուցելու իրավիճակի մասին, ինչը կամրապնդի ԵՄ-ի ըմբռնումը տեղում իրավիճակի վերաբերյալ։ Առաքելությունը նաև նպաստելու է միջնորդական ջանքերին Եվրոպական խորհրդի նախագահ Շառլ Միշելի գլխավորած գործընթացի շրջանակում։
Առաքելության նախնական մանդատը լինելու է երկու տարով, գործառնական շտաբը լինելու է Հայաստանում: Քաղաքացիական գործողությունների հրամանատարը լինելու է Ստեֆանո Թոմաթը՝ Քաղաքացիական պլանավորման և վարման կարողությունների EEAS-ի կառավարիչ տնօրենը: Առաջիկայում նշանակվելու է նաև տեղում գործողությունները ղեկավարող առաքելության ղեկավար։
Էմմա Չոբանյան
