Մենք արդեն հստակ ազդակներ ենք ստացել Ֆրանսիայից, ԱՄՆ-ից, Ռուսաստանից, որ ԼՂ հարցը չի փակվել․ Ռուբեն Վարդանյանը՝ BBC-ին

ՀՀ իշխանությունները հայտարարել են, որ կընդունեն Արցախի ղեկավարների ցանկացած որոշում։ Այս մասին BBC-ի HARDtalk հաղորդմանը տված հարցազրույցում հայտարարել է Արցախի պետնախարար Ռուբեն Վարդանյանը՝ նշելով, որ Արցախը հստակ ազդակներ է ստացել Ֆրանսիայից, ԱՄՆ-ից, Ռուսաստանից, որ ԼՂ հարցը չի փակվել։

«Հայաստանի իշխանությունները, ՀՀ կառավարության ղեկավարն ասել է, որ մենք՝ Արցախի ղեկավարներս, ինչ որոշում կայացնենք, նրանք կհետևեն մեր ընտրությանը։ Սա առաջինը: Եվ երկրորդ՝ մենք արդեն հստակ ազդակներ ենք ստացել Ֆրանսիայից, ԱՄՆ-ից, Ռուսաստանից, որ հարցը չի փակվել, էջը չի շրջվել։ Ուստի, չնայած Ադրբեջանի, միջազգային հանրության հայտարարություններին… Ի դեպ, ՄԱԿ-ի Անվտանգության խորհրդում վերջին քննարկումները հստակ ցույց տվեցին, որ հարցը փակված չէ։ Որովհետև մենք ունենք ինքնորոշման իրավունք, որովհետև էթնիկ զտումների արգելքը գրված է ՄԱԿ-ի կանոնադրության մեջ։ Ուստի, չնայած Ադրբեջանի կողմից հնչող բոլոր շահարկումներին, պատմությունն ավարտված չէ։ Մենք հավատում ենք մեր անկախության իրավունքին, մեր հայրենիքում ապրելու իրավունքին։ Արցախում ապրող մարդկանցից շատերը հասկանում են, թե ինչ դժվարությունների կբախվեն։ Նրանք պատրաստ են մնալ և պաշտպանել իրենց տունը՝ չնայած նրան, որ մենք փոքր երկիր ենք, իսկ նրանք (Ադրբեջանը)՝ շատ մեծ»,- հայտարարել է Արցախի պետնախարարը։

Հաղորդավարի հարցին՝ արդյո՞ք Արցախի գոյատևման միակ հույսը Վլադիմիր Պուտինն է, Ռուբեն Վարդանյանը հայտարարել է, որ դա այդպես չէ։

«Դա ճիշտ չէ։ Նախագահ Մակրոնը հստակ ասել է և բազմաթիվ ջանքեր է գործադրել Արցախին աջակցելու համար։ Ի դեպ, նույն հայտարարությամբ է հանդես եկել նաեւ Ֆրանսիայի Սենատի խոսնակը։ ԱՄՆ դեսպանը վերջերս հայտարարել էր, որ ԱՄՆ-ն աշխատելու է Ռուսաստանի հետ՝ գտնելու լուծում, որը կօգնի Արցախը դուրս բերել այս իրավիճակից։ Դուք այստեղ մի քիչ մանիպուլյացիա եք անում, քանի որ արևմտյան խոշորագույն երկրները, ինչպիսիք են Ֆրանսիան և ԱՄՆ-ը, հասկացրել են, որ իրենց հետաքրքրում է, թե ինչ է կատարվում այստեղ»,- ասել է Վարդանյանը:

Տաթև Ֆռանգյան