Չկա որևէ դեպք, որ գումարի պատճառով բանակի համար գնում չկատարենք. Ալեն Սիմոնյան. ՏԵՍԱՆՅՈՒԹ

ՀՀ ԱԺ նախագահ Ալեն Սիմոնյանը լրագրողների հետ զրույցում պատասխանելով հարցին՝ արդյոք պաշտպանության նախարար Սուրեն Պապիկյանը չպետք է հրաժարական տա տեղի ունեցած ողբերգությունից հետո, երբ հունվարի 19-ին Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում բռնկված հրդեհի հետևանքով 15 զինծառայող զոհվել է, 3-ը՝ ծանր վիրավորվել, պատասխանեց․ «Պաշտպանության նախարարն այս ամենի հետ որևիցե ձևով չի կարող կապ ունենալ, որովհետև իր գործառույթի մասով ինքն իր աշխատանքը ամբողջովին արել է։ Այդ քաղաքական սակարկումները նախարարի վերաբերյալ՝ սին, անտեղի եմ համարում, որովհետև նա պատասխանատվություն է վերցրել իր վրա պատերազմից հետո և համաձայնություն է տվել այդ վիճակում բանակը վերցնել և սկսել բարեփոխել»։ 

Սիմոնյանի խոսքով՝ Պապիկյանը բարեփոխումներ է իրականացնում` սկսած անձնակազմում փոփոխություններից, վերջացրած կահավորումից, դրսից տարբեր որակի և բարձր մակարդակի կահավորում են ներմուծելու ՀՀ։

ԱԺ նախագահն ընդգծեց՝ Հայաստանի Հանրապետությունը բանակի վրա ծախսելու համար գումարի խնդիր չունի, և 2018 թվականից սկսած դեպք չի եղել, որ գումար չլինելու պատճառով որևէ գնում չկատարվի։  

Սիմոնյանի խոսքով՝ տվյալ կացարանում, որտեղ զինծառայողները տեղակայված են եղել, անվտանգության կանոնները խախտված են եղել, օրինակ` չպետք է լինեին ճաղավանդակներ։

«Այն մարդիկ, որոնք պատասխանատու են անվտանգության համար, պատժվել և պատժվելու են։ Քաղաքական ղեկավարությունն այդ հարցով իր կողմից արել և շարունակելու է անել ամեն ինչ։ Վստահեցնում եմ` կատարված փոփոխությունները եթե չլինեին, ապա պատահարները ավելի շատ կարող էին լինել։ Այնուամենայնիվ, դժբախտ պատահարը սարքել քաղաքական շահարկման թեմա ու դա փորձել մտցնել քաղաքական օրակարգ` անտեղի եմ համարում»,– նշեց ԱԺ նախագահը։