Վրաստանի նախագահը չի ողջունում ՌԴ-ի հետ հնարավոր ավիահաղորդակցության վերականգնումը

Ես չեմ ողջունում Ռուսաստանի հետ ավիահաղորդակցության վերականգնումը։ Այս մասին հայտարարել է Վրաստանի նախագահ Սալոմե Զուրաբիշվիլին, փոխանցում է Վրաստանի Առաջին ալիքը։

Նրա խոսքով՝ այն ժամանակ, երբ «բոլոր գործընկեր երկրները խոսքով կամ գործով առավելագույն համերաշխություն են հայտնում Ուկրաինայի անձնուրաց պայքարին, իր ու հասարակության մեծ մասի համար կառավարության և իշխող կուսակցության դիրքորոշումն անհասկանալի է»։

«Ես կիսում եմ այն ​​փաստարկը, որ նրանք օգտագործում են այս դիրքորոշման համար, այսինքն՝ դա, իբր, ծառայում է Ռուսաստանում ապրող վրացիների խնդիրները մեղմելուն։ Չնայած ամիսներ շարունակ իմ բոլոր ջանքերին՝ ինձ չհաջողվեց  արդյունքի հասնել քաղաքացիության տրամադրման չափանիշների պարզեցման հարցում․ մի խնդիր, որն ամենից շատ անհանգստացնում է արտերկրի մեր հայրենակիցներին, այդ թվում՝ Ռուսաստանում բնակվող։ Ներկայում, եթե մենք ինչ-որ կերպ հիշում ենք Ռուսաստանի հնացած հնարքները, պետք է հասկանանք, որ Կրեմլը «շպրտելու է» նման թեմաները, երբ հույս ունենա ինչ-որ պառակտում ստեղծել մեր և մեր արևմտյան գործընկերների միջև։ Դա անընդունելի է»,- ասվում է Զուրաբիշվիլիի հայտարարության մեջ։

Նա կոչ է արել կառավարությանը լրջորեն ստուգել ՌԴ քաղաքացիների հոսքի հարցը՝ իր բոլոր սոցիալական և քաղաքական չափանիշներով, որպեսզի հանրությունը զգա, որ հաշվի են առնվում և պաշտպանվում են իր ազգային շահերն ու անվտանգությունը։

«Նաև թռիչքները վերսկսելու փոխարեն՝ կառավարությունը պետք է հոգ տանի երկրի հեղինակության մասին, կտրականապես պատասխանի երկրի հասցեին հնչող մեղադրանքներին՝ Վրաստանի միջոցով պատժամիջոցները շրջանցելու մասին։ Այդ ամենը պահանջում է պետական լուրջ մոտեցում ու մեղադրանքների հերքում, որոնք կլինեն կատեգորիկ ու փաստերով»,- ասվում է Վրաստանի նախագահի հայտարարության մեջ։

Էմմա Չոբանյան