29.10.2026 | 16:10
Արամ Վարդևանյանի ճեպազրույցը` ՈւՂԻՂ
Վրաստանն ու Թուրքիան նախատեսում են խորացնել անվտանգային գործընկերությունը
Քաղաքականություն
18.01.2023 | 21:51
Վրաստանի խորհրդարանի պաշտպանության և անվտանգության հանձնաժողովի պատվիրակությունը՝ Իրակլի Բերաիայի գլխավորությամբ, պաշտոնական այցով գտնվում է Թուրքիայի մայրաքաղաք Անկարայում։ Այս մասին տեղեկությունը տարածել է Վրաստանի խորհրդարանի մամուլի ծառայությունը, փոխանցում է Aliq Media-ն։
Ըստ տեղեկության՝ այցի շրջանակներում Վրաստանի օրենսդիրները կհանդիպեն Թուրքիայի Ազգային պաշտպանության, հետախուզության և պաշտպանության, ինչպես նաև ներքին գործերի հանձնաժողովների նախագահների և անդամների հետ։ Հանդիպումներ կկայանան նաև ՆԱՏՕ-ի Խորհրդարանական վեհաժողովում Թուրքիայի Ազգային մեծ ժողովի (մեջլիսի) խորհրդարանական պատվիրակության ղեկավարի և Թուրքիայի օրենսդիր մարմնի՝ Վրաստանի հետ բարեկամության խմբի հետ։
Նշվում է, որ նախատեսվում է խորհրդարանականների այցը թուրքական օդատիեզերական արդյունաբերության ընկերություն՝ Turkish Aerospace Industries (TAI) և պաշտպանության ոլորտում առաջատար տեխնոլոգիական ընկերություններից մեկը՝ HAVELSAN։
«Վրաստանի խորհրդարանական պատվիրակության այցի նպատակն է խորացնել համագործակցությունը երկու երկրների օրենսդիր մարմինների միջև, ամրապնդել համագործակցությունը Վրաստանի խորհրդարանի պաշտպանության և անվտանգության հանձնաժողովի և Թուրքիայի Ազգային մեծ ժողովի համապատասխան հանձնաժողովների միջև»,- նշված է հաղորդագրության մեջ:
