Ադրբեջանի ԱԳՆ-ն արձագանքել է Արարատ Միրզոյանին

Ադրբեջանի ԱԳՆ-ն արձագանքել է ՀՀ ԱԳ նախարար Արարատ Միրզոյանի հայտարարությանը, որ Բաքուն մեկ ամիս է՝ չի պատասխանում Երևանի առաջարկներին ու սառեցրել է խաղաղության գործընթացը։

Ադրբեջանի ԱԳՆ խոսնակ Այխան Հաջիզադեն նշել է, որ հայկական կողմի նման հայտարարությունները զարմանալի են՝ հաշվի առնելով, որ Ադրբեջանը հանդիսանում է կողմերի հարաբերությունների կարգավորման գործընթացի նախաձեռնողը, այդ թվում՝ խաղաղության պայմանագրի ստորագրման։

«Ուզում եմ ևս մեկ անգամ հիշեցնել հայկական կողմին, որ խաղաղ համաձայնագրի շուրջ բանակցությունները չեն ընթանում այնպես, ինչպես ներկայացնում է Հայաստանը։ Հայտնի է, որ խաղաղության պայմանագրի տեքստն Ադրբեջանը քննարկման է ներկայացրել անցյալ տարվա հոկտեմբերի 2-ին Ժնևում, իսկ փաստաթղթի քննարկումները շարունակվել են Վաշինգտոնում։ Չնայած որպես բանակցային գործընթացի շարունակություն 2022 թվականի դեկտեմբերի 23-ին Մոսկվայում երրորդ հանդիպում անցկացնելու պայմանավորվածությանը՝ հայկական կողմն էր, որ միակողմանիորեն չմասնակցեց հանդիպմանը՝ դրանով իսկ խախտելով բանակցային գործընթացը։ Ադրբեջանական կողմն ակնկալում է Հայաստանի համաձայնությունը հաջորդ հանդիպումն անցկացնելու համար՝ համաձայնեցնելու խաղաղ համաձայնագրի տեքստը, այլ ոչ թե խաղաղ գործընթացին վնասող սադրիչ հայտարարություններ»,- նշել է նա։

Ադրբեջանի ԱԳՆ ներկայացուցիչն այդպես էլ չի ասել, թե ինչո՞ւ ադրբեջանական կողմը չի պատասխանում Հայաստանի առաջարկներին։

Հիշեցնենք, որ Ադրբեջանի ԱԳ նախարար Ջեյհուն Բայրամովը դեկտեմբերի 23-ին Մոսկվայում հայտնել էր, որ Բաքուն ստացել է Հայաստանի առաջարկները։ Բայրամովն ասել էր, որ հասցրել է մի փոքր ուսումնասիրել առաջարկները, սակայն գործընկերների հետ մանրամասն քննարկում չի եղել։ Նա հավելել է, որ կա ընդհանուր պատկերացում փաստաթղթի հետ կապված։

«Դժվար է ասել՝ փաստաթուղթը բավարարո՞ւմ է մեզ։ Բնականաբար, գործընթացը հեշտ չէ, բարդ է։ Կողմերի դիրքորոշումները շատ դեպքերում տարբեր են, ուստի առաջարկները պետք է քննարկվեն մի քանի փուլով։ Այդ քննարկումների արդյունքում ավելի հստակ եք արտահայտում ձեր դիրքորոշումը մյուս կողմին և ավելի լավ եք հասկանում մյուս կողմի դիրքորոշումը։ Երեկ Հայաստանի վարչապետը հայտարարել է, որ պատրաստ է ստորագրել իրենց ներկայացրած պայմաններով համաձայնագիրը։ Բայց մենք հասկանում ենք, որ պայմանագրերն այդպես չեն կնքվում։ Ելնելով այս տրամաբանությունից՝ մենք պատրաստ էինք հոկտեմբերի 2-ին Ժնևում մեր պայմաններով համաձայնագիր ստորագրել»,- ասել էր Ադրբեջանի արտգործնախարարը։

Էմմա Չոբանյան