«Արցախահայությունը պետք է զգա, որ մենակ չէ․ ներքաղաքական ու արտաքին սադրանքներին չպե՛տք է տրվենք»․ Անդրանիկ Քոչարյան․ ՏԵՍԱՆՅՈՒԹ

Խաղաղության ամենահուսալի երաշխավորը ազգային ներուժի գործածումն ու սեփական ուժերին ապավինելն է։ Այս մասին Ազգային ժողովում հայտարարությունների ժամին իր ելույթում նշեց Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը՝ խորհրդարանի ամբիոնից անդրադառնալով արցախահայության խնդիրներին ու նրանց կողքին լինելու կարևորությանը:

«Արցախցին հազարամյակներ շարունակ ապրել է իր հողում՝ Արցախում, ընտելացած է ու սովոր այդ հողին, բնության բոլոր տրամադրությունների ու կանոնների հետ ապրելուն, կապված է իր ծննդավայրին նաև հուզական խոր արմատներով:

Ամեն մարդ իր միջավայրն ունի, ու այդ վայրն այնպիսինը պետք է լինի, որ ոչ թե կյանք առնես ու հեռանաս, այլ մնաս, ապրես, արարես ու միշտ ուզենաս վերադառնալ: Այսօր մեր գերխնդիրն է անել հնարավոր ամեն բան, որ արցախահայությունը չզրկվի ճակատագրով իրեն վիճակված մայր հայրենիքից:

Այսօր արցախահայությունը պետք է զգա, որ մենակ չէ, բոլոր քաղաքական գործողություններից զատ պետք է զգա մի քանի կիլոմետր այն կողմ գտնվող իր հայրենակիցների անհանգստությունը, սերը և աջակցելու պատրաստակամությունը: Մենք պետք է հաղթահարենք անտարբերությունը, անկեղծությունը դարձնենք գերակա ու հասնենք իրական եղբայրության գաղափարին:

Հիմա մեզ մնում է միայն գիտակցել այս ամենն ու ամուր կամք դրսևորել՝ չտրվելով ներքաղաքական ու արտաքին քաղաքական սադրանքներին, բոլոր հնարավոր ռիսկերն ու մեր հնարավորությունները հնարավորինս ճիշտ հաշվարկենք ու գործենք միասնական»,- նշեց  Քոչարյանը:

Մանրամասները՝ տեսանյութում։