«Ի՞նչ գործ ունի «նապաստակ փարթիում» Ձեր նման լուրջ քաղաքական գործիչը». Ալեն Սիմոնյանը հեգնեց․ ՏԵՍԱՆՅՈՒԹ

ԱԺ «Հայաստան» խմբակցության քարտուղար Արծվիկ Մինասյանը ԱԺ-ում հայտարարեց, որ իրենց խմբակցությունը Հաշվեքննիչ պալատի անդամի քվեարկությանը չի մասնակցելու:

Ազգային ժողովի փոխնախագահ Ռուբեն Ռուբինյանը «քաղաքական աբսուրդ» որակեց ԱԺ-ում ընդդիմադիրների քվեարկության ձևը։

Ռուբինյանն ընդգծեց, որ եթե բոլոր նախագծերին ընդդիմությունը քվեարկում է ձեռնպահ, այդ թվում ոչ այնքան մեծ քաղաքական բեռ ունեցող նախագծերին, ինքը կարող է ենթադրել, որ ընդդիմությունն ուղղակի քվեարկում է, որպեսզի տեխնիկական պահանջը կատարի և չզրկվի աշխատավարձերից և կարծիք հայտնեց, որ ընդդիմությունն իրեն տրված մանդատը չի իրականացնում:
Վարման կարգով ելույթ ունենալով՝ Ռուբինյանը դիմեց «Հայաստան» խմբակցության պատգամավորներ Արծվիկ Մինասյանին ու Արթուր Խաչատրյանին․ «Պետք չէ նյարդայնանալ կամ սրտնեղել իմ ասածներից, ես շատ պարզ բան եմ ասում։ Դուք շարունակաբար, գրեթե մեխանիկորեն, գրեթե բոլոր նախագծերին քվեարկում եք ձեռնպահ, ընդ որում` առանց հիմնավորելու ձեր քվեարկության պատճառը։

Ես կարծում եմ, որ քաղաքացիները` այդ թվում ձեզ ընտրած, բայց ոչ միայն ձեզ ընտրած, որոնցից մեկն եմ ես, իրավունք ունեն իմանալու՝ ի վերջո ձեր դիրքորոշումները որո՞նք են։ Այլ բան, որ գուցե ձեր դիրքորոշումը ընդհանրապես ձեռնպահ լինելն է խորհրդարանում, երկրում և ընդհանրապես, բայց դա այլ հարց է»։

«Պարո՛ն Ռուբինյան, չգիտեմ ինչից եք նեղվել,- արձագանքեց «Հայաստան» խմբակցության պատգամավոր Գեղամ Մանուկյանը,- գուցե ինչ-որ զարգացումներ են եղել, շատ եք նեղվել, բայց մի դիրքորոշում հստակ կա՝ Կառավարության կողմից ԱԺ բերվում են հազար ու մի տեսակ ոչ էական, ամեն շաբաթ փոփոխվող օրենքների նախագծեր, որոնք էական որևէ բան չեն փոխում մեր երկրում։
Իսկ դիրքորոշման առումով մի բան հստակ գիտենք՝ այս կառավարությունը անելիք չունի մեր երկրում, այս մի բանը հստակ գիտենք։ Հստակ ցուցանել ենք, որ այս կամ այն նախագիծը վտանգավոր է, այս կառուցվածքային փոփոխությունը վտանգավոր է, դրա մասին հստակ ասել ենք։ Հետո ժամանակը գալու է մեր դիրքորոշումներին հակառակ ձեր կողմ քվեարկելու համար զղջալու եք»։

«Պատիվ ունեմ» խմբակցության ղեկավար Հայկ Մամիջանյանը ևս արձագանքեց Ռուբեն Ռուբինյանին՝ նշելով․ «Մենք դիրքորոշում ենք հայտնել մի շատ կարևոր հարցում, որի շուրջ կարծիք, ոնց որ թե, չեք համարձակվում ասել ոչ մեկդ, որ Արցախը երբեք Ադրբեջանի կազմում չպետք է լինի։ Երբ որ դրա դիրքորոշումը կասեք, ձեր «սնդիկ փարթիների» մասին դիրքորոշումը կլսեք: Երկրորդը՝ ես ներողություն եմ խնդրում Արցախի այն քաղաքացիներից, որոնք ընդհատվող ինտերնետով ու բլոկադայի պայմաններում ստիպված են նայել էս «նապաստակ նկարոցին։

Իսկ ինչ վերաբերում է ընտրակեղծիքներին, դուք ձեր սեփական կուսակցության վարչության ընտրության ժամանակվա ընտրակեղծարարներին պարզեք, հետո մնացածին անցեք»։

Ընդդիմադիր պատգամավորների խոսքին արձագանքեց ԱԺ նախագահ Ալեն Սիմոնյանը. «Նախևառաջ՝ ի՞նչն է խանգարում, որ դուք, պարո՛ն Մանուկյան, օրենսդրական նախաձեռնությամբ հանդես գալ, երկրորդ՝ ոչ միայն կառավարության կողմից ներկայացված նախագծեր էին բերվել, նաև հիշեցնեմ, որ կառավարությունը ՀՀ ժողովրդի կողմից ընտրված կառավարությունն է, և ես չեմ հասկանում ի՞նչ գործ ունի «նապաստակ փարթիին» ձեր նման լուրջ քաղաքական գործիչը»:

Մանրամասները՝ տեսանյութում։